20 апрельыште Советский район Ургаш книгагудышто марий поэтессе А.Щербакован «Висвис пеледышла коднем мый шарнашда» сборникшын презентацийже эртаралтын.
Тиде – Антонида Михайловнан кумшо книгаже. Икымшыже «Араман садерем – шӱмыштем» 2020 ийыште савыкталтын, а кокымшыжо – «Ӱжарам мурсемыште тӱрлем» 2021 ийыште.
У сборникын редакторжо семын Ургаш книгагудым вуйлатыше Э.Бастракова пашам ыштен. Корректор сомылым поэтессе Д.Рычкова шуктен.
А.Щербакован шомакшылан возымо муро-влакат улыт. 2023 ийыште «Идалыкысе муро» конкурсышто мурызо Эльвира Попова тудын шомакшылан возымо «Кодем шарнаш» мурым йоҥгалтарен да Гран-прим сеҥен налын.
Презентаций годым Эльвира Бастракова поэтессын илышыж нерген каласкален. Кужэҥер район Осыпъял ӱдырлан «Ямде лий» газетын ончычсо тӱҥ редакторжо А.Юзыкайн МарГУ-ш тунемаш пураш темлымашан серышымат кучыктен. Но шуко шочшан ешыште кушшо Алевтина тидым ыштен кертын огыл. Ургызылан тунем пытарен. Изиракше годым возымо почеламутшо-влак пожареш йӱленыт. А угычын поэзий корныш 2019 ийыште шогалын да кызыт шкем чолган палдара.