1 февраль гыч Россий Социальный фондын Марий Элысе пӧлкаже ава капиталым да тудын кодшо суммыжым 9,5 процентлан кугемден. Марий Элыште
илыше 21 397 ешын ава капиталже кугемын.
Кӧн кугемын?
Икымше йочалан ава капиталын кугытшо – 690 266,95 теҥге. Тыгаяк кугытым налеш кок йочан еш, кунам кокымшо йоча 2020 ий марте шочын, а ача-ава сертификат дене ик ганат пайдаланен огытыл.
А еш, кушто кокымшо йоча 2020 ийыште да тулеч вара шочын, а ньоган шочмыж марте ешын ава капиталлан праваже лийын огыл, тудын кугытшо – 912 162,09 теҥге.
Икымше йочалан ава капиталым налше ешлан, кокымшо йоча шочмеке, ешартыш 221 895,14 теҥге тӱлалтеш, ондак пуымо оксам тӱрыснек кучылтын гынат.
Индексаций ава капитал дене пайдаланыдыме еш-влакын веле огыл, икмыняр ужашыжым кучылтшо-влакынат лиеш.
Сертификатысе кодшо оксат ешаралтын.
Россий Социальный фондын Марий Элысе пӧлкаже индексацийым йодмашым возыде ышта.
Ава капитал гыч кучылтдымо мыняр окса кодмым еш Госуслуги порталыште, Соцфондын клиентский службылаштыже да шуко функциян рӱдерыште эре пален налын кертеш.
Ава капиталым теве молан кучылташ лиеш:
илыме верым саемдаш;
кум ияш марте йочалан кажне тылзын выплатым налаш;
йочан образованийжылан;
аван накопительный пенсийышкыже;
инвалид-йочан обществыште социальный адаптацийжылан да интеграцийжылан;
сертификатыште 10 тӱжем теҥге деч шагал кодшо оксам иканаште налаш.
Илыме верым саемдаш
Кундемыштына ава капитал дене илыме верым саемдаш ик эн чӱчкыдын пайдаланат. Марий Элыште 2024 ийыште 2,7 тӱжем еш пӧртым чоҥаш але пӧртым (пачерым) налаш кучылтын.
2025 ий гыч ава капитал дене пӧртым (пӧртын ужашыжым але блокированный застройкан пӧртым) налаш манын, пӧртын илаш йӧршылан да илыме верын йодмашыжлан келшен толмыжо шотышто заключений лийшаш.
Тыгай документым межведомственный комиссий-влак пуат, тушкыжо жилищный инспекцийын, Роспотребнадзорын да моло ведомствын еҥышт пурат. Пӧртлан положительный заключенийым район администрацийыште налаш лиеш. Тылеч вара сертификат оза комиссийын оформитлыме заключенийже дене Россий Социальный фондын Марий Элысе пӧлкашкыже кая да ава капиталым кучылташ йодмашым воза.
Кажне тылзын
Ава капитал гыч тыгак кажне тылзын тӱлалтше выплате дене чӱчкыдын пайдаланат. Пӧлка кундемыштына 1000 ешлан тыгай оксам тӱла.
Тудым кеч-кудо йочалан налаш лиеш, но доход ешысе ик еҥлан илен лекташ ситыше кок кугыт деч шукырак лийшаш огыл. Марий Элыште тиде кугыт – 31 210 теҥге.
2025 ий гыч илен лекташ ситыше кугытын ешаралтмыжлан кӧра выплатын кугытшо вашталтын да 15 137 теҥге лийын.
Тыгодым ешын погыжым да ача-аван пашам ыштымыштым але укем огыт ончо.
Иканаште налаш лиеш
Ава капитал оксам кучылтмеке, сертификатыште 10 тӱжем теҥге деч шагалрак окса кодеш гын, 2024 ий сентябрь гыч тудым еш иканаште налын кертеш.
Россий Соцфондын пӧл-каже тыгай йӧн нерген Госуслуги порталыште шижтара. Кодшо оксам налаш манын, Госуслуго, клиентский службо але шуко функциян рӱдер гоч йодмашым возыман.
Ӱмаште тыгай права дене Марий Элыште 733 еш пайдаланен.