Йошкар-Олаште «Сердце матери» мер толкынын Марий Элысе ший волонтёржо-шамыч СВО-што улшо пӧръеҥ-влаклан тӱрлӧ семын полшат. Поснак маскироватлалтме сеткым шуко пидыт.
Кум тӱрлӧ
– Ме сеткым кум тӱрлӧ семын пидына. Иктыже – «G» технике, весыже тыглай лышташым ушештара, а кумшыжым «автоматный» манына. Тудым лӱмын келыштарыме станок полшымо дене ыштена, вара эше чия дене чиялтена. Сеткым ландшафтлан келшышым ямдылаш тыршена. Мутлан, салтак-шамыч ошман верыште верланат гын, ошалгыракым пидына. Лавыран верыште, лышташ-влак коклаште улыт гын, тӱрлӧ тӱсым кучылтына. Ямде сеткым фондла але отпускыш толшо салтак-влак гоч колтена.
Ме уна-влаклан моткоч йывыртена, кажне гана чайым пырля йӱаш, мутланаш ӱжына, тауштена да элнам аралыше-влаклан мо кӱлешым умылкалена, – ойлат ший волонтёр-влак.
Тиде гана «Сердце матери» мер толкыныш СВО-н участникше Александр Семёнов толын ыле. Тудо ший волонтёр-влак дене шукертак палыме – нуно ятыр гана гуманитарный полышым колтеныт. Салтак-влак, мо кӱлешым возен, йодмашым колтеныт.
Лӱдмаш лушка
Ӱстел коклаште ой почеш ой пиже. Тыге Александр нерген шукырак пален нална. Пӧръеҥ Чуваш Республикысе Канаш олаште шочын-кушкын. Школ деч вара чоҥымо паша мастерлан тунем лектын. Армийыш каен да Екатеринбург олаште рӱдӧ военный округын ушымо стратегический командований штабыште радиосвязь специалистлан служитлен. Вара Йошкар-Оласе ракетный дивизийыш контракт почеш пашаш пурен.
– 2011 ий гыч контракт почеш служитлем. 2024 ий майыште Донецк Калык Республикыш командировко дене каенна. Тудо ноябрь марте гына шуйнышаш ыле, но тушеч мемнам Белгород областьыш колтеныт. Тачысе кече марте тушто улына, тушман деч элнан чекшым аралена. Подразделенийыште ик пӧръеҥ Татарстан гыч, весыже – Мурманск гыч, а молыжо – Марий Эл гыч. Сарыште чыланат икгай улына гынат, самырык-шамычым утларак чаманена, – палдара А.Семёнов.
«Кайыме почешда могай нелылык дене вашлияш логалын?» йодышлан Александр тыге вашештыш:
– Тӱҥалтыште мланде йымалне илаш, шке да лишыл еҥ-влакын илышышт верч мутым кучаш лӱдыкшын чучын. Тыгай жап лийын, кунам мый шкежат кум гана пуйто угыч шочынам. Но ты ситуацийыште эн уда – лӱдмаш лушкемеш.
Толмо почеш тыште шуко огына лий шоненна, сандене блиндаж ден кухньым гына ыштенна. Но тиде кугу йоҥылышна ыле. Мончам чоҥаш кӱлын, но кызыт нӧлтен огына керт, вет эре лӱйкалат. Мушкылташ тӱрлӧ йӧным муына: мемнан деч 10 меҥге тораште ферме пашам ышта. Тушто колонко гыч вӱдым налаш да душыш пураш кудалыштына.
Рвезе-шамыч дене, оксам поген, машинам налынна. Тудын дене мый кочкышым да вӱдым налаш кудалыштам. Каныш кечын мыланна арнялан 210 литр вӱдым (кечылан 1 литр – ик еҥлан) да кум яшлык кочкышым (тушонко, шӱраш, пареҥге, шоган да кешыр) пуат. Но тушонкым эре кочкын шер темеш, сандене кевытыште мо кӱлешым шкаланна налына. Черет дене кочкаш шолтена.
Александр деч позывнойжо нергенат каласкалаш йодна. Тудо тыге вашештыш:
– Позывнойым иктышт шке ойырен налыт, весыштлан пуат, а кумшыштлан пӱралтеш. Икана бой гыч каналташ пӧртылынна, тушто чот лӱйкаленыт, сандене мый икмыняр жап нимом колын омыл. Рвезе-шамыч шке коклаштышт мутланеныт, вара мыйым ӱжыныт, кычкыреныт, а мыйже колын омыл, шке пашамым ыштен шогенам. Тыге мыланем «Глухой» позывнойым тушкалтен пуэныт.
Тений теле йӱштӧ огыл. Сандене рвезе-шамыч лавыраште почаҥыт. Тушман деч шылаш манын, маскироватлалтме сеткым кучылтыт. Ондак тудын дене кӱлеш верым, ӱзгарым леведыт, вара ӱмбакыже лышташ да укш-влакым кышкат. Тӱҥ шотышто нуно иктаж-мом кудалтыме, пудештарыме деч аралат, осколкым кучен кодат.
Сандене Александр деч могай сеткыже утларак пайдале манын йодмеке, тудо чылажат шерге да кӱлешан вашештыш.
Сеткым пидаш кумылан-влакым Йошкар Армийын тӱвыра пӧртыштыжӧ тыгай адрес дене вучат: Йошкар-Ола, Сталинградский кредалмаш герой-влак урем, 35-ше №-ан пӧрт. Йодышым рашемдаш телефон: 89023585714.