Аҥысыр специальностян врач деке молан участковый врач гоч возалтман?
Елена Иванова.
Марий Эл Республикысе Тазалык аралтыш министерствын эмлыме-профилактике полыш да лицензирований пӧлкан советникше Наталья Чегаева вашешта:
– Тӱрлӧ чер годым ик симптомак лийын кертеш. Мутлан, айдемылан шӱмжӧ корштымыла чучеш, а чынжым гын тудын ӧрдыжлу кокласе невралгий але пагар-шоло корнысо чер.
Участковый терапевт – шуко палыше врач. Тудо чыла йодыштеш да кӱлеш специалист деке приёмыш колта. Адакшым диагнозым шындаш да умбакыже кузе эмлалтмым палемдаш аҥысыр специальностян врачлан ешартыш лабораторный да инструментальный тергымаш-влак кӱлыт, тушкыжо врач-терапевт колта. Тидыже аҥысыр специальностян врач деке уто гана амал деч посна коштмым шагалемдаш полша.
Тендан хронический черым ондакак пален налме да аҥысыр специальностян врач дене диспансерный тергымаште шогеда гын – вес паша. Туддеке логалаш манын, терапевт гоч ончылгоч возалтман огыл.
Тыгодым южо врач-специалист деке возалташ терапевт деке кайыме огеш кӱл. Мутлан, офтальмолог, отоларинголог, акушер-гинеколог, врач-психиатр-нарколог, врач-фтизиатр, врач-стоматолог деке шке возалташ лиеш, эмлымверысе регистратур але кугыжаныш услугым пуышо портал гоч.