Газетым мотрым ышта

«Ямде лий» йоча газетым изижге-кугужге куанен лудыт. Ош кагазыште тӱрлӧ чиян мотор фотом, сӱретым да молымат шымлаш лиеш. Тышке шукыж годым школышто тунемше-влак возкалат, тыгак газет пашаеҥ-влак тӱрлӧ материалым савыктат. А нунын пашаштым газет лаштыклашке дизайнер моторын чумыра. Шукерте огыл «Ямде лий» газетыште моткоч талантан, моторлыкым шижын моштышо дизайнер Элина Ямбаршева пашам ышташ тӱҥалын.

Изинек сӱретлаш йӧратен

Элина Шернур район Эпак ялыште шочын-кушкын. Кукнур кыдалаш школышто шинчымашым поген. Ӱдыр изинекак сӱретлаш йӧратен, садлан школысо кружокышто моштымашыжым таптен. Кружокым Валентин Петрович Алгаев вӱден. Тудо школышто рисований, черчений предметым туныктен. Туныктышо тыгак пу гыч пӱчкедыме кружокышто мастар йоча-шамыч дене пашам шуктен. Тушко Элина пырля тунемше йолташ ӱдыржӧ дене коштын. Ты кружокышто шукыжо рвезе-шамыч лийыныт гынат, ӱдыр-влаклан келшен. Тылеч посна Э.Ямбаршева шкенжым моло вереат шуарен. Тидын нерген тудо тыгерак палдарыш:

– Мый спорт дене пеҥгыде кылым кученам. Ече дене коштынам. Школын чапшым тӱрлӧ таҥасымаште араленам. Районышто ик гана веле огыл сеҥыше-влак радамыште лийынам.

9-11-ше классыште тунеммем годым марий литератур дене олимпиадылаште шкем тергаш тӱҥалынам. Районышто икмыняр гана икымше вер дене палемдалтынам, но республикыште шукыж годым эре нылымше лийынам. Сылнымут конкурслашкат шуко гана ушненам. Почеламутым сылнын лудын моштымемлан, мыйым тӱрлӧ вере коштыктеныт.

Чонлан келшыше лийже

Школ деч вара Элина МарГУ-со историко-филологический факультетын «рекламе да общественность дене кыл» специализацийлан тунемаш пурен.

– Мыйым творческий профессий-влак сымыстареныт. Такшым экономический факультетыш тунемаш пураш шоненам. Но тушто мыланем йокрок лиймым умылымеке, рекламым ойырен налынам. Вет мый изи годсек усталык шӱлышан кушкынам, тӱрлӧ кидпашам йӧратенам. Шарнем, школышто тунеммем годым оригами технике дене йӱксым ыштенам. Тудо родо-шамычлан келшен, мый дечем ыштен пуаш йодыныт. Кызыт унала мийымекем, нунын полкыштышт шке пашамым ужам. Куанле, – каласкалыш Э.Ямбаршева.

Элина университетыштат тӱрлӧ вере шуаш тырша. Ик жап «Мурсем» ансамбльыш коштын, но тунеммаште вараш кодаш огыл манын, тушечын каяш логалын. Кызыт эше йоча газетыште пашам ышта. Садлан, чынжымак, ӱдырын жапше чӱдӧ.

Ум кычалын

Кокымшо курсыш вончымыж годым Элина иктаж-мом ум ышташ тунемшаш ыле манын шоналтен. Тыге тӱрлӧ соцсетьыште Web-, графический дизайным эскераш кумылаҥын. Тидлан лӱмынак онлайн курсым налын. Тылзе утла шинчымашыжым пойдарен, тӱрлӧ заданийым шуктен.

– Тӱрлӧ видеоурок гоч Figma, Tablink программе дене пашам ышташ тунемынам. Тӱҥалтыште йӧсын чучын, ик заданийым шукташ кок-кум шагат дене шинчылтынам. Кызыт гын иктажшым вич минутышто ыштен сеҥем. Курсым эртымеке, шке семынат ятыр заниматленам. Сайт-влаклан макетым да молымат ыштылынам, – мане тудо.

«Ямде лий» газетыш корно

Университетыште кокымшо курсын кокымшо семестрыштыже «Основы вёрстки» дисциплиным туныкташ тӱҥалыныт. Тидыже Элиналан дизайнер семын шуаралташыже эшеат сай йӧным ыштен.

– Туныктышем Евгения Васильевна Карпова газетыш дизайнер-верстальщикым кычалме нерген уверым колтен. Молан тӧчен ончаш огыл, вет газетысе дизайным палем манын шоналтенам. Тыге резюмем пуэнам. Тылеч вара мыйым пашаш ӱжыныт.

Конешне, Web- ден газетысе дизайн коклаште ойыртем уло. Но функций-влак икгайракак улыт, кнопко-шамычат тугаяк улыт, манаш лиеш. Адакшым мый йоча-влаклан газетым верстатлем, садлан балансым шотышто кучыман. Тӱсым, текстлан келшыше чиям ойырен, фото дене пашам ыштен моштыман, – палдарыш ӱдыр.

Э.Ямбаршеван архивыштыже ятыр сӱрет аралалтеш. Тудо изи годсо пашаже-влакым лӱмын папкыш чумырен. Кызытат йӧн лекме семын, карандашым кидыш налын, тӱрлым «воза». Тыге чон кана, кумыл нӧлтеш, манеш. А тудын дизайн пашажым ужнеда гын, «Ямде лий» газетым шергалын кертыда. Ӱдыр, чынжымак, шке пашажым сайын шукта!

И.Золотарёван фотожо.