Советский район Ӱшнур селаште илыше Наталья Петрован сад-пакчаштыже 40 наре тӱрлӧ роза кушкеш! Роза веле огыл, моло пеледышат, утларакшым – шукияш.
Наталья розам черенкований манме йӧн дене шукемда. Ӱмаште шыжым, мутлан, 200 наре роза вургым мландыш кереден коден. Телым «илен лекше-влакым» тудо атылаш кусарен шында да унала толшо родыжо, йолташыже-шамычлан пӧлекла. А Натальян унаже-влак ик ганат яра огыт тол – эре пеледыш дене.
– Чайно-гибридный сорт-влак розам шыжым пӱчкедем, а спрей, флорибунда да вондер семын кушшо-шамычым кермыч дене пызыртем да кукшо куэ лышташ дене урем. Ӱмбачынже лӱмын петырыме материал дене (6-шо номеран келшен толеш) леведам. Тыге роза-влак телым огыт кылме, – палдара Н.Петрова.
Шкалан ситышым гына
Пакчасаска росотам Наталья утыждене ок шынде – шкаланже ситышым гына: помидор ден киярым, шере пурысым, арбуз ден дыньым. Кияр нӧшмым, мутлан, «Тёща» ден «Зятёк» урлык-влакым налеш. Тыгай сорт саска лектышыж дене куандара, телылан банкылаш шинчалташат келшен толеш: ок пушкыдем, тугаяк пеҥгыде кодеш. Росотам озавате майыште, тылзе кушкаш тӱҥалме годым, йыраҥыш луктын шында.
Атыласе кушкыллан шке ямдылыме ӱяҥдыш нергенат тудо палдарыш. Нужым, лопшудым, шӧршудым кугурак атыш пышта, тушко вӱдым тема, ломыжым ешара да ик арня шинчыкта. Ик литр тыгай ӱяҥдышым 9 литр вӱд дене вара да росоташ шава.
Лум шулен – паша ятыр
Кызытат озавате шуко жапым пакчаште эртара, тушто сомыл ситышын: кукшо лышташым удырен кораҥда, роза ден гортензийым, лапчатка вондерым пӱчкеда, ӱяҥда. Вондерлан гын Наталья тыгай удобренийым шава. Ик литр леве вӱдыш кок кугу совла мочевиным, тынарак магний сульфатым пыштен луга. Ты ӱяҥдышым 9 литр вӱд дене вара да кажне вондерыш кок литр дене шава.
Сад-пакчаште тыршаш Н.Петровалан келша, ты сомылым тудо йӧратен ышта. Чоным пыштен ыштыме пашан лектышыжат куандара: шошо гыч шыже марте ӱдырамашын пакчаже, кудывечыже тӱрлӧ тӱс дене пеледше кушкыл дене сылнештыт.
Н.Петрован альбомжо гыч налме фото.