Театрыш чӱчкыдын коштыт

Надежда Моисееван фотожо.

«Йошкар-Ола театральная» фестиваль кышкарыште таче, 24 мартыште, Марий самырык театр Зинаида Долгован пьесыж почеш шындыме «Ир мӱкшигын мурыжо» спектакльым ончаш темлыш.
Тиде кастене театрын залыштыже яра вер кодынат огыл, спектакльым ончаш изижге-кугужге моткоч шуко еҥ погынен. Нунын коклаште студент-влакат лийыныт.

Параньга район Матародо гыч Михаил Мимеев, Морко район Изи Маршан гыч Ярослав Васильев да Шернур район Кугэҥер гыч Евгений Пакеев Йошкар-Оласе аграрный колледжыште тунемыт. Рвезе-влак яра жапыштым пайдалын эртарат, театрыш чӱчкыдын коштыт.

«Ме тӱрлӧ театрыш коштына. Марий спектакль-влакым утларак йӧратена. Ме шкежат вет марий улына, садлан шочмо йылме дене шындыме постановко-влак оҥайракын чучыт.
«Ир мӱкшигын мурыжо» спектакль келшыш. Тушто ешын историйже ончыкталтеш, герой-влакын койыш-шоктышышт шонаш тарата», — каласышт рвезе-влак.

 

Надежда Моисеева.