Морко районышто верысе инициативылан полшышо программе почеш тӱрлӧ сомылым илышыш шыҥдарат.
Октябрьский ял шотан илемын вуйлатышыже Татьяна Гаврилован ойлымыж почеш, ӱмаште ты программын конкурсыштыжо Эҥерсола кундемын кок объектше сеҥышыш лектын. Тыге йоча-шамычлан «Кече» площадкым чоҥымо да тысе Механизатор-влак уремым ачалыме. Тений Садовый уремым шотыш кондаш конкурсыш ушнымо. Ты ганат сеҥыше-влак радамыш логалме. Тидыже, мутат уке, куандара. Вет тыгай программе-влаклан кӧра селаште илыше-шамычлан илыш условийыштым саемдаш йӧн ышталтеш. Нуно мом ышташ, ачалаш, шотыш кондаш, тӱзаташ кӱлмым шке палемдат.
Морко районышто илыше-влак ты программыш 2014 ий годсек ушнат. Тудлан кӧра районышто 41 объектым шотыш кондымо. Тидлан 33,6 миллион оксам ойырымо.