14 июнь – Вӱр донорын тӱнямбал кечыже
Россий МВД-н Чуваш корно пӧлкажын Йошкар-Ола полицийын линейный пӧлкажым вуйлатышын алмаштышыже юстицийын старший лейтенантше Пётр Вичужанин изиж годым артист лияш
шонен. Тыге школ деч вара И.С.Палантай лӱмеш тӱвыра да сымыктыш колледжыш тунемаш пурен. Но вашке умылен: ты сомыл чонжылан лишыл огыл, тудын еҥ-влаклан полшымыжо шуэш. Колледж деч
вара армийыш каен, вузым тунем лектын да илышыжым полицийыште служитлыме дене кылден.
Артист гыч следователь марте
Пётр Александрович Звенигово район Чёрное Озеро посёлкышто шочын-кушкын. Аваже посёлкысо йочасадым вуйлата, ачаже лесничествыште водительлан ышта. Изаж ден акаже улыт.
Полицейскийын мутшо почеш, чыла тунемме тӧнежым тудо шонен ойырен, ача-аваже эре полшеныт.
– Палантай лӱмеш колледж деч вара Межрегиональный открытый социальный институтышто (МОСИ) «Юриспруденций» направлений дене заочно тунемынам. Вара Марий кугыжаныш университетын магистратуржым ты специализаций денак пытаренам. 2017 ийыште Россий МВД-н Йошкар-Оласе Следственный управленийышкыже осал пашам расследоватлыме шотышто пӧлкаш следовательлан пашаш пуренам, – ойла П.Вичужанин.
Полшаш шонен
Пӧръеҥ ответственный да поро кумылан улмыжым виян шӧрынжылан шотла. Тыгай койышыжак, очыни, следовательым донор лияш таратен. Икымше гана П.Вичужанин вӱрым 2014 ийыште пуэн.
– Шоненак донор лийынам. Еҥ-влаклан полшымем шуын. Умыленам: мыйын вӱрем ала-кӧн илышыжым утарен коден кертеш. Соцкылысе ик тӱшкаште полыш кӱлеш манын увертарымашым ужынам, тушто Республикысе вӱрым пуымо станцийын адресшым ончыктымо ыле. Икымше гана вӱрым сдатлымеке, тугай шижмаш лийын, пуйто таче калыклан ала-мом пайдалым ыштенам, ала-кӧлан полшенам, ала-кӧн илышыжым утарен коден кертынам.
Идалыкыште ныл гана вӱрым сдатлаш тыршем. Вӱрым пуымеке, вигак пашаш кудалам. Тидлан каныш кечым налаш лиеш гынат, пашашке шке сомылем шукташ вашкем. Вет вӱрым пуымеке, ны нойымым, ны тазалык лунчыргымым ом шиж, садлан мыланем каныш кече ок кӱл, – ойла полицейский.
Таче кечылан Пётр вӱрым 35 гана сдатлен, «Почётан донор» лӱмым налаш манын, вич гана вӱрым але плазмым сдатлашыже кодын.
Светлана Козлова.
П.Вычужанинын альбомжо гыч налме фото