Россий Президент В.Путин 2024 ийым элыштына Ешын идалыкше семын увертарен. Тудын дене келшышын, еш дене тӱрлӧ мероприятийым эртараш палемдыме. Нунын кокла гыч иктыже – «Всей семьёй» Российысе проект. Тудын почеш ача-ава да икшыве-шамыч кажне арнян тӱрлӧ заданийым шуктышаш улыт. Заданийым шуктымеке, тидым фото дене пеҥгыдемдыман да, #всейсемьёй, а Марий Эл гыч еш-влаклан эше #всейсемьёй12 хештег дене соцкыллаште вераҥдыман.
Марий Эл гыч ты проектыш 300 утла еш ушнен. Ты радамыште – Морко посёлко гыч Семеновмытын ешат.
Наталия ден Виталий Семеновмыт 2000 ийыште ешым чумыреныт, ныл икшывышт: Ксения, Анастасия, Матвей, Гордей – уло. Ксения Чебоксар оласе кугыжаныш университетын студенткыже, ончыкылык врач. Настя тыгак ты оласе педколледжыште шинчымашым нӧлта, туныктышо лияш ямдылалтеш. Матвей нылымше классыште тунемеш. Спортлан шӱман икшыве кушкеш. Гордей икымше классыш коштеш. Сӱретлаш, кушташ, спорт дене заниматлаш кумылан.
Ты ешыште поро пашам шуктымылан кугу тӱткыш ойыралтеш. Семеновмыт ешыште изижге-кугужге волонтёр улыт. Тыгак нуно жапым пайдалын да веселан, тӱҥжӧ – чулымын эртараш йӧратат. Таза илыш-йӱлам кучымаш – ешын ик эн тӱҥ ойыртемже. Сандене Семеновмыт чылан гаяк арнялан икмыняр гана бассейныште ийыт, ече дене коштыт да коньки дене мунчалтат. Кеҥежым гын утларак жапым пӱртӱсыштӧ эртарат: чодыраште, пасушто лияш тыршат.
Ешыште кугуракым пагалаш, изиракым чаманаш, поро сомылым шукташ туныктат. Патриотизм шӱлышым пеҥгыдемдыме, пӱртӱсым аралыме да порылык дене кылдалтше моло пашам ыштымылан вуйын шогат. Эртыше ийыште шыжым республикысе «Марафон добрых дел» мероприятийыште участвоватленыт. «Всей семьёй» конкурсыш икымше заданий гычак ушненыт. Тидын нерген Наталия Валерьевна тыгерак каласкалыш:
– Тачысе кечылан конкурсын кандаш заданийжым шуктенна. Умбакыжымат уло кумылын нуным ышташ тӱҥалына. Тылеч ончыч «Это у нас семейное» Российысе конкурсыш ушненна ыле. Жап чӱдылан кӧра умбакыже участвоватлен кертын огынал. Лач тунам мый уэш школышко пашаш пӧртылынам. Морко посёлкысо икымше номеран школышто воспитатлыме паша шотышто советник улам. Икманаш, вуйге школысо илышыш «пурен каенам». Тыгак Морко районысо ӱдырамаш-влакын ушемыштын председательжылан шогем да еҥ-влакын йодмышт почеш тӱрлӧ пайремым але мероприятийым вӱдем.
Мыйын шонымаште, тыгай конкурс-влак еш-шамычым утларак вияным да пеҥгыдым ышташ полшат. Тидыжым икте-весе коклаште шкем кузе кучымо да мутланыме годым поснак шижаш лиеш. Мутлан, изирак-влак шкеныштым чолганрак кучаш да кугурак-шамыч дене келшаш тунемыт.
Илышыште шкем чолган ончыктымылан, чыла вере шуаш тыршымылан тунемын шуынам. Мыланем тыгай «пӧрдемыште» илаш келша, икшывем-шамычымат шкем гаяк лияш туныктем. Моткоч кугу тау родо-пошкудем-влаклан тидын шотышто кугу полышым ыштымыштлан. Нунын полшымышт денак посёлкыштына шкешотан еш клубым чумыренна. Тушто улшо еҥ-влак дене пырля тӱрлӧ спорт мероприятийым эртарена, пӱртӱсыш лектына, канена. Поро паша нергенат огына мондо: Кугу Отечественный сарын участникше-влакын шӱгарыштым ачалена, СВО-лан маскировочный сетьым пидаш, сортам ышташ полшена да тыгайрак сынан моло акцийышкат кумылын ушнена.
Мутат уке, илышыште кажне еҥын – шке пӱрымашыже. Но порылык кеч-кӧмат сӧрастара да тудын дене кугешнаш тарата. Семеновмыт тидын шотышто пример улыт. Ты ешын эше ик ойыртемалтше йӱлаж нергенат палемдыман: нуно путешествоватлаш йӧратат. Ынде кум ий почела Наталия ден Виталий машинаш шинчыт да Владивосток марте кудалыт. Мӧҥгеш толшыштла, Байкалыш пурыде огыт чыте. Наталиян палдарымыж почеш, тора кундемлаш ача-ава дене пырля икшыве-шамычат тарванынешт, сандене нуно йочан шонымашыштым илышыш шыҥдарышаш улыт.
Семеновмыт еш ты шонымашыш шуыт манын, ӱшанена. Вес семынже лийынат огеш керт, вет нунылан ешын пиалже да поянлыкше нимо деч шерге.
Еш альбом гыч налме фото-влак.