Илыме да каныме кумдыкым тӱзатыме шотышто Российысе йӱклымашым эртараш полшаш волонтёр-влакым вучат. Тудым «Формирование комфортной городской среды» федеральный проектын «Жильё и городская среда» проектше почеш илышыш пуртат.
15 январьыште Российысе «Малая родина – сила России» муниципалиет-влакын форумышт годым ДОБРО.РФ платформын да волонтёр-влакын рӱдерыштын ассоциацийыштым вуйлатыше Артём Метелев волонтёр-влаклан ты пашаш ушнаш регистрацийым почмо нерген ойлен.
Палемдыман, ты проект кӱшеш тӱрлӧ кумдыкым (набережныйым, каныме верым, паркым, скверым, уремым, спортплощадкым) да молымат саемдышаш улыт. Тыгак тидын шотышто проект паша дене Российысе конкурсыш ушнаш йӧн пуалтеш. Эн сай, ойыртемалтше проектым темлыше-влаклан шонымашыштым илышыш шыҥдараш полшат.
Элыштына илыше, 14 ияш деч кугурак кажне еҥ ушнен кертеш. Йӱклымаш почеш кажне регион могай кумдыкым эн ончыч тӱзатынеже, палемдат. Волонтёр-влак ты пашам вораҥдараш полшымашке нылымше гана ушнат. Нуно еҥ-влаклан йӱклымашым молан эртарымым, тудын тӱҥ шонымашыжым умылтарат. Нуно лӱмын палемдыме верлаште, тӱшка мероприятийлаште пашам ыштат. Йӱклаш шонышо кажне еҥ нунын деч полышым йодын але нунын гоч шке йӱкшым пуэн кертеш.
Ӱмаште поро пашам шукташ 100000 наре доброволец ушнен. Тыге команде дене ятыр паша шукталтын. Шке илыме верыштым тӱзаташ полшаш кумылан еҥ-влак кугыжаныш кучем дене ик командыште пашам ыштат.
Волонтёр радамыш ушнаш шонышо еҥлан ДОБРО.РФ платформышто (Голосование за благоустройство 2024) регистрацийым эртыман. Тудо шканже палемдышаш: проектыш ушнаш ямде улмыжым, калык дене кумылын мутланен, тӱрлӧ йодышлан чын да раш вашмутым пуэн моштымыжым, пеҥгыде койыш-шоктышыжым.
Волонтёр да доброволец-влакын пашаштым регионысо волонтёр штаб-влак организоватлаш тӱҥалыт. Кажне кундем лӱмын келыштарыме программым ямдыла.
2023 ийыште волонтёр-влаклан кӧра йӱклымашке 14 миллион утла еҥ ушнен. Тений йӱклымаш ӱмашсе семынак март-апрельыште эртаралтеш. Ты проектлан кӧра 2030 ий марте элыштына ятыр верым саемдышаш улыт.