2023 ий 8 сентябрьыште Российын экономикыжым вияҥдыме министерствыже национальный туристический маршрут-влакым палемдыме шотышто экспертный советын заседанийжым эртарен. Тушто кундемна «Великий Волжский путь» регион-влак кокласе маршрут дене палдарен. Экспертный советын палемдымыж почеш, ты маршрутлан национальный статусым пуымо. Ты проект Марий Эл, Татарстан, Чуваший республик-влак дене палдара. Тидыже регионлаште туризмым утларак вияҥдаш полшаш сай йӧным ышта.
Марий Элысе Спорт да туризм министерстве тыгак регионысо туристический инфраструктурым комплексно вияҥдымылан кугу тӱткышым ойыра. Ты шонымаш денак «Центр этнотуризма на Волге» проект шочын. Тудо Юл кундемысе федеральный округын «Волжское путешествие» туристический проект-влакын инициативышкыже логалын. Кундемышкына турист-влакым толаш кумылаҥдаш да эҥерысе туризмым вияҥдаш манын, ончыкыжым ты проект негызеш тӱрлӧ меропрятийым илышыш шыҥдараш шонат.
Грантым пуат
Кундемыштына внутренний да въездной туризмым вияҥдымаштат кугу паша шукталтеш. Туризм сферыште тыршыше-влак тӱрлӧ проект конкурсышто кажне ийын участвоватлат, тидлан лӱмын проектым возат. Ойыртемалтше паша-шамычым илышыш шыҥдараш полшаш манын, Марий Элым Вуйлатыше деч грантым налаш йӧн уло. Такшым Марий Элысе ятыр туристический проект Россий кӱкшытан конкурслаштат эреак участвоватла.