20 октябрьыште Поварын тӱнямбал кечыжым палемдат. Тудым, очыни, кажне суртозан пайремжылан шотлаш лиеш. Вет ме кажне кечын манме гаяк ешнам тӱрлӧ тамле кочкыш дене куандараш тыршена. А кажне суртозан, тудо шкешотан да ойыртемалтше. «Кугарня» ден «Ямде лий» газет редакцийлан пашаеҥышт деч тыланда икмыняр рецептым да кухньылан келшыше лайфхакым темлена. Ала ыштен ончаш кумылда лектеш?
Вуйлатыше деч шашлык
Эдуард Иманаев, директор:
– Мыйын умылымаште, шашлык – шылым ик жап шулыктарыше вӱдыштӧ (рассолышто) кучымо, а вара тул ӱмбалне кӱктымӧ пӱртӱсыштӧ тамлаш келшыше кочкыш. Пӱчкеден, шоган, пурыс дене варен, вигак мангал ӱмбак оптымо шылым шашлыклан ом шотло. Ты тамле пушан кочкышым ямдылыме рецепт шуко уло, кӧлан могай келша, тугайым ойыра. Мый уксус кислота але лимон полшымо дене шулыктарыман шашлыкым йӧратем: кӧ кочкын ончен гын, мо пеш тамле манын йодыныт эреак. 2-3 кило сӧсна шыл гыч ыштыме шашлыклан 1-1,5 лимон кӱлеш, 3-4 шоган, специй але шем пурыс сита, ик кугу совла наре шинчал (мый вискалыде шавалтем), кок кугу совла майонез. Келшыше кугытан атыш шылым 3-4 см моклалкалан пӱчкеден оптыза. Лимоным, шоганым, тыртышын пӱчкеден пыштыза, тушкак майонезым, шинчал ден специйым ешарен, пырля варыза. Лимоным темдышт, сокшым лукташ гын, сайрак. Эн шагалже 3-4 шагат шинчыкташ келшен толеш, а тыге кечыгут шинчыкташ уто огыл, шыл пушкыдырак лиеш.
Шотыш налза:
– Тамле лийже манын, чылажымат кумылын ыштыман.
– Эн тӱҥжӧ – шылым моштен кӱкташ кӱлеш: шашлыкым тул ӱмбач ондак кораҥдет – ямде ок лий, шуко кучет – утыждене кӱэш але кошка.
– Шорык шылан шашлыклан лимон ок келше, сандене мый тудым уксус дене шинчалтем.
– Эше шашлыкым газан минерал вӱд, шоган, шинчал, специйым варен ыштат, тамле лиеш.
– Гриль-решеткаш кӱктымӧ шылын тамже шампуреш кӱктымӧ гай огыл.