Мый индеш пачашан тошто пӧртысӧ ик пачерыште шкетын илем. Авамым ныл ий ончыч тоенам. У пӧртыштӧ сай пачерым налаш шонем, садлан шуко пашам ыштем, мӧҥгӧ пелйӱд лишан веле толам.
Ик кеҥеж кечын мӧҥгӧ ик шагат йӱдым веле пӧртылынам. Толмекем, кофем йӱын, ыштен шуктыдымо пашам тӧрлен шинчылтынам. Пӧлемыште шокшо лийын, садлан балкон омсам почынам. Пачерем, пӧртын пытартыш пачаштыже верланен. Балконем леведыш деч посна лийын. Изишак юалгаш шонен, тамакым пижыктен, тушто шогылтынам. Ончылнем – тӱрлӧ тул дене волгалтше тымык, шып ола. Еҥ-влак огыт кошт, машина-влак огыт кудалышт… Кум шагат эр.
Эше изишак пашам ыштышаш манын шоналтенам веле, балкон могырым пылышемлан трук ала-могай йӱк-йӱан солнен, но чыла вере шып. Йӱк-йӱан эшеат чот талышнен, пуйто ала-кӧ пӧртвуйышто коштын. Кӧ тушто шонымаш дене балконыш уэш лектынам. Туштыжо пӧртвуй гыч куптыр чуриян, шучко куван ӱмбакем шинчам пашкартен ончымыжым ужынам. Лӱдмем дене пачерыш мӧҥгеш куржын пуренам. Эрйӱдым пошкудо Люба акам кычкыраш куржынам. Тудын дене пӧрт коклаш кӱзенна да шучко шоҥго кувам кычалынна, но ерештын огынал. Люба ака мыланем сыренат ыле, вет мый тудым ныл шагат эрдене кычкыренам. Шканемат ӧпкелалтынам да тетла эр марте пашам ышташ ом тошт манынат шоненам. Но эрдене вес пошкудо ӱдырамашын аваже колымо нерген увер шоктыш. Эрйӱдым пӧрт ӱмбалне тудо коштын улмаш. Ты шоҥго ковам мый шукертсек ужын омыл, садлан чурийжым вигак пален омыл. Тылеч вара йӱдвошт пашам ыштымым чарненам.
Анатолий.
Медведево посёлко.