2025 ийыште Российысе Социальный фондын (СФР) Марий Элысе пӧлкаже ӱдырамаш-влаклан медицине услугым пуымо шотышто родовой сертификатлан 30 млн утла теҥгем ойырен.
Тыгай сертификат почеш услугым налме йӧн дене 3400 утла еҥ пайдаланен. Тудо мӱшкыран ӱдырамашын тазалыкшылан, азам ыштымылан да варажым азалан ик идалык качестван медицине полышым пуымылан гарантийым пуа. Тышке ӱдырамаш консультацийыште тергалтмаш, кӱлеш анализым сдатлымаш, УЗИ, психологын полышыжо, азам ыштымаш да тудын тазалыкшым педиатр дене эскерымаш пурат.
Сертификат почеш ӱдырамаш шкенжым да азажым эскераш медицине организацийым шке ойыра. Документым ӱдырамаш консультацийыш, Аза пӧртыш да Йоча поликлиникыш икымше гана мийыме годым электрон йӧн дене ыштат. Тидлан паспорт, ОМС полис да СНИЛС кӱлыт. Сертификат нерген увер Российысе Социальный фондын сайтыштыже личный кабинетыште лиеш.
Родовой сертификат кум талон гыч шога:
- 1-ше талон 4 000 теҥгеаш – ӱдырамаш консультацийыште тергалтмаш, тыгак права, психологий да медико-социальный полышым налмаш;
- 2-шо талон 6 000 теҥгеаш – азам ыштыме годым да тылеч варасе медицине полыш;
- 3-шо талон 2 000 теҥгеаш – Йоча поликлиникыште азам ик идалык эскерымаш.
Сертификат олмеш оксам налаш ок лий. Тудым СФР-ын Марий Элысе пӧлкаже вигак медицине организаций-шамычлан колта. Ӱдырамаш оксам тӱлен эскералтеш гын, родовой сертификатым огыт оформитле. Ешартыш йодышым единый контакт-рӱдерыште 8-800-100-00-01 телефон дене рашемдаш лиеш.