Марий Эл Республикысе паша верым ситарыме шотышто службо лӱмгечыжым пайремла.
Тудын полшымыж дене 30 ий жапыште 415 тӱжем утла еҥ пашам муын, 52 тӱжем наре еҥ у специальностьым налын. Тачысе кечын пашам муаш йодмашым Интернет гоч колташ лиеш, тидлан «Работа в России» порталыш пурыман. Ты базыште уло элысе вакансий-влакым вераҥдыме.
Кызыт паша верым ситарыме шотышто службо ончылно кугу задачым шындыме: пашадыме-влак пандемий деч ончычсо наре веле лийшаш улыт. 2020 ийыште, мутлан, 19 тӱжем еҥ пашам йодын, тидыже 2019 ий деч 2,5 пачаш шукырак.
Пытартыш жапыште республикыштына пашадыме-влак 2,3 пачаш шагалемыныт (2,6% гыч 1,17% марте иземын), 3,8 тӱжем еҥлан паша кӱлеш.
Лӱмгече пайрем Э.Сапаев лӱмеш опер да балет театрыште эртен. Паша верым ситарыме шотышто службо пашаеҥ-влакым Марий Элым вуйлатыше А.А.Евстифеев саламлен да кугыжаныш награде-влакым кучыктен.
Владимир АПТУЛАЕВ.