Кодшо ийын Марий Элыште илыше-влаклан эмым налаш 3 млрд утла теҥгем ойырымо. Нине эм препаратым еҥ-влаклан оксам тӱлыде пуымо.
Тышеч 2,2 млрд утла теҥгеже медицине организацийлаште эмлаш пуалтын. А льготник-шамычлан эмым 12 тӱҥ направлений дене ойырымо – тидлан 850 млн наре теҥгем кучылтмо.
Эмым налаш кажне ийын республикын бюджетше гыч шукырак окса ойыралтеш. 2023 ийыште Марий Элысе бюджет окса 2021 ий дене таҥастарымаште 2,3 пачаш шукырак лийын – 257 млн теҥге гыч 586 млн теҥге марте кушкын.
Льготан эм-влакым налме дене эн шерге направленийлан сакыр диабет дене черле-влакын препаратышт шотлалтеш. Кодшо ийын тидлан 2021 ий дене таҥастарымаште 2,9 пачаш шукырак оксам колтымо. Тыгак йоча-шамычын вӱрыштышт глюкозым кӱрылтде эскерыше I типан системылан ешартыш 10 млн теҥгем ойырымо.
Кызыт утларакше шкенан элыште ыштен лукмо эм-влакым налыт.