12 августышто Самырык-влакын тӱнямбал кечышт палемдалтеш. Российын законодательствыж дене келшышын, 14 ий гыч 35 ий марте ийготан еҥ-влак «самырык тукымлан» шотлалтыт.
Маристатын увертарымыж почеш, 2021 ий тӱҥалтышыште Марий Элыште 178,8 тӱжем еҥ тиде тӱшкаш пура, тидыже 26,5% лиеш.
Маристат тиде категорийышке пурышо йотэлла гыч толшо-влакымат шотлен. 2020 ийыште Марий Элыште 2 650 йот студент тунемеш. Нуно Алжир, Гвиней, Египет, Италий, Йемен, Колумбий, Конго, Ливий, Паластина, Судан, Шри-Ланка, Азербайджан, Армений, Киргизий, Таджикистан, Узбекистан да Туркменистан гыч толыныт.
Аспирантурышто кандаш йот студент тунемеш, ординатурышто – кумыт. Нуно СНГ элла гыч улыт: Киргизий, Таджикистан, Узбекистан, тыгак мӱндыр йотэлла гыч: Судан, Вьетнам, Китай да Йемен гыч.