Марий Элым вуйлатыше А.Евстифеев регионысо 1 февраль гыч льготник-влакын социальный выплатыштым 25 процентлан индексироватлен.
Тӱҥ категорийлан Пашан ветеранже, тылын труженикше да реабилитироватлыме еҥ-влакым шотлымо, 1 январьлан кундемыштына 42 тӱжем 138 тыгай еҥ уло. Рӱдӧ отопленийдыме пӧртлаште илыше Пашан ветеранже ден реабилитироватлыме еҥ-влаклан пӧртым шокшемдыме услугылан, тыгак медикаментлан кугурак оксам пуаш темлалтын.
Кок але утларак инвалид йочам ончышо пашадыме ача-ава-влаклан, шуко шочшан еш-шамычлан пӧртым шокшемдыме услугылан, тыгак кугыжаныш наградан еҥ-влаклан (тыгайже 7968 еҥ лиеш) пуымо выплате-влакым индексироватлат.
Шуко шочшан еш-влак шотыштат сай вашталтыш уло: школлаште йочалан кочкышлан пуымо да пӧртым шокшемдыме услугылан ойырымо компенсацийымат кугемдыме.
Икмыняр социальный полыш идалык тӱҥалтыштак автоматически индексироватлалтын. Мутлан, йоча пособий, нылымше да тылеч вара шочшо йочалан пуымо ава капитал, инвалид йочам ончышо ача-авалан выплате, тулык икшыве-влаклан вургемлан, моло сатулан пуымо окса 8,4 процентлан кушкыныт.
Уверым 11 февральыште лекше «Кугарня» газетын номерыште лудса.