Тений идалык мучаш марте Марий кундемыштына 25 объектым капитально чоҥен шуктышаш улыт.
Кодшо ийын Российыште 80 млн утла квадратный метр илыме верым чоҥымо. Тений элыштына 1300 школым чоҥышаш улыт. Нунын коклашке Йошкар-Олаште, Козьмодемьянскыште да Медведево посёлкышто лийшаш у школ-влакат пурат. Тыге кундемыштына 6600 ешартыш тунемме вер лиеш. Тыгак план почеш ялласе тӱвыра пӧрт ден тоштер-влакым ачалышаш улыт.
Республикыш нацпроект да социально-экономически вияҥдыме индивидуальный программе почеш тений федеральный бюджет гыч 10 млрд утла теҥге толшаш. Тыге чоҥымо пашан кугытшо 2 пачаш кушкеш.
Кызыт 79 объектым тӧрлымӧ-уэмдыме шотышто паша шукталтеш. Тышеч 25 объектше тений ямде лийшаш. Нунын коклаште Йошкар-Олаште верланыше Перинатальный рӱдер, Козьмодемьянскысе, Красногорский ден Юрино посёлкыласе стадион-влак, Йошкар-Оласе да Медведево районысо йочасад-влак, у микрорайонласе объект-шамыч улыт. 2023 ийын икымше пелийже марте Йошкар-Олаште Келшымаш пӧрт чоҥалтшаш, тидлан 700 наре млн теҥге ойыралтшаш.
Снимкыште: Перинатальный рӱдер.
Д.Речкинын фотожо.