Эртыше каныш кечылаште Йошкар-Олаште да Звениговышто кок изи йоча окна гыч камвозын.
Звениговышто изи рвезын кроватьше почмо окна воктен шоген. Йочан аваже кухньышто лийын. Тудо эҥгек нерген пошкудыжо-влак деч гына пален налын. Рвезе, пиалешыже, вондерыш волен возын, садлан кӧра дыр, тиде тудын арален коден. Кызыт ньога — эмлымверыште.
Тыгаяк ойго Йошкар-Олаште лийын. Тушто визымше пачаш гыч 11 тылзаш ӱдыр лектын возын. Тудо чот нелын сусырген, больницыште кия. РФ СК-ын Марий Элысе СУ-н пашаеҥ-влак тиде эҥгекым тергат.