Сӱрем тылзын 14-ше кечынже Морко районысо Кораксола ялыште божественный литургий пӱтынек марла эртаралте.
Тыгай миссионер кумалмаш мемнан Кораксола кундемыштына икымше гана лийын. Литургийыш Кораксола кундемысе калык деч посна районнан тӱрлӧ верже гыч еҥ-шамыч толыныт.
Кугу пайрем Шнуй Косьма ден Дамианым шарныме лӱмеш эртен.
Тыште калык пеш кугу чон ласкалыкым шижын. Кумалмаш мучашлалтмеке, Морко посёлкысо, Арын да Шеҥше храмла гыч Рушарня школ-влакын тунемшышт калыклан концертым ончыктеныт.
Концерт программыш Кораксола тӱвыра пӧртнан «Муро кумыл» фольклор ансамбльжат ушнен.
Шӱргыял школын столовыйыштыжо шокшо шӱрым ямдыленыт. Пайремыш толшо кажне айдеме могай-гынат чесым конден.
Ты пайремышке кугу надырым пыштыше протоиерей Леонтий Очетовлан, протоиерей Николай Чузаевлан да иерей Евгений Шамаевлан моткоч кугу таум каласена.
Елена ГРИГОРЬЕВА,
Кораксола тӱвыра пӧртым вуйлатыше.