«Большая перемена» конкурсын финалжым иктешленыт. Российысе тӱрлӧ регионла гыч 5-7-ше классыште 600 тунемше тиде финалыш лектыныт.
Йошкар-оласе 14-ше №-ан гимназийыште тунемше Ульяна Николаева да Бауман лицейыште шинчымашым погышо Мария Лежнина ден Варвара Веселова финалист радамыште улыт.
Шушаш сентябрьыште нуно Владивостокыш миен толыт, — увертара регионысо туныктыш да шанче министерстве.
Кок ий жапыште «Большая перемена» конкурсыш миллион утла школьник ушнен. Россий Федерацийын президентше Владимир Путин ты конкурс нерген тыге ойлен: «Конкурс у шӱдыр-влакым гына огыл, самырык уста-влакын шӱдыр тӱшкаштым чӱктен». Тидын деч вара «Большая перемена» конкурсым кажне ийын эртараш мутым теҥгыдемденыт.