Пагалыме йолташ-влак!
Марий Эл Республикын Кугыжаныш Погынжын лӱмжӧ дене саламлем тендам
Российысе календарьыште улшо ик эн волгыдо пайрем – Молодёжь кече – дене!
Молодёжь – элыштына тӱрлыжымат шочыктышо вий-куат, тудын пашаче, интеллектуальный да творческий ресурсшо.
Таче Российым тӱрлӧ могырым темдыме жапыште элыштына самырык да илышыште сеҥымашыш шушо лидер-влак кӱлыт, поснак – политикыште да бизнесыште, образованийыште да наукышто, тӱвыраште да спортышто. Тыгак пайдале пунчалым луктын моштышо, чылажымат вискален да шонен ыштыше профессионал-шамыч кӱлыт, кӧмыт шочмо олан але селан, Марий Элын да чумыр Российын ончыкылыкышт верч мутым кучаш ямде улыт.
Куанем: ӱдыр ден рвезе-влак чолга улыт, шке принципышт дене каят, шинчаончалтышышт дене палдарат, шкеныштым тӱрлӧ федеральный площадке ден проектлаште чулымын ончыктат, волонтёр толкынышко, тыгак молодёжный парламентын, мер ушем ден организаций-влакын пашашкышт ушнат.
Пагалыме йолташ-влак! Ме Марий Элыште качестван шинчымашым налаш, тендан талантдам шуараш да сомылдам илышыш ворандараш ончыкыжымат тыршаш тӱҥалына.
Ӱшаныза шке вийланда, кӱкшӧ цельым шындыза да тиде шонымашке шуаш тыршыза!
Тазалыкым, пиалым, тыныслыкым да порылыкым тыланда!
Пайрем дене! Российысе Молодёжь кече дене!
Марий Эл Республикын Кугыжаныш Погынжын председательже
А.В.Смирнов.