Ты кечылаште республикысе школлаште пытартыш йыҥгыр йоҥгалтеш, тидын лӱмеш пайрем лиеш.
Выпускник-шамыч мо шотышто тургыжланат? Нунылан школлаште умбакыже тунемаш кайыме шотышто могай мероприятий-влак эртаралтыныт? Йоча-влак республикысе вузлашке тунемаш пурынешт але моло оласе вузым ойырен налыныт?
Владислав Виногоров, Звенигово район Шолэҥер школын туныктышыжо:
– Историйым да обществознанийым туныктышо семын йоча-влакын экзаменлан ямдылалтмышт шотышто тыгерак каласен кертам. Тунемше-влак тӱҥ шотышто материал сборникым налыт, РешуЕГЭ, Незнайка сайтлаште тестым возен ончат, тӱрлӧ вебинарым колыштыт. Чаманен каласаш логалеш, кызыт ӱдыр-рвезе-влак экзаменлан уло вийым пуэн огыт ямдылалт. Тургыжланыме шотышто ӱдыр-влак ойыртемалтыт, нуно отвественныйрак улыт. Ончыкыжым тунемаш Йошкар-Оласе, Озаҥысе да Чебоксарысе вузлаш кайынешт. Тӱҥ шотышто гуманитарный, технический да строительный направленийлам ойыреныт.
Фотом еш альбом да Йошкар-Оласе мэрийын сайтше гыч налме.