Роспотребнадзорын Марий Элысе управленийжын палдарымыж почеш, 2021 ийыште 1376 еҥым пий пурлын, нунын кокла гыч 405-ше – 14 ияш марте йоча-влак. Тидыже 2020 ий дене таҥастарымаште 6,3 процентлан шукырак, а ятыр ий жапысе деч – 5,3 пачаш шукырак.
2021 ийыште республикысе чыла районышто, олаште пий еҥ-влакым пурлын, но эн шукыжо – Йошкар-Олаште (408), Волжскышто (210), Звенигово (116), Медведево (94) да Волжский (83) районлаште.
Тений кум тылзыште156 еҥым пий пурлын,34-ше – 14 ияш марте йоча-влак.
Февральыште Йошкар-Олаште орышо черан ик пий нерген пален налме, орымо чер ваштареш прививкым ыштыме лийын огыл.
Кундемыштына пий пурлмылан кӧра колышо уке.
Российыште ондак пийым кучымо шотышто ик посна закон лийын огыл. Региональный кучем-влак шке кундемыште иктаж нормативный актым луктын кертыныт, кудыжо, мутлан, олаште пий дене кузе кошташ кӱлмым рашемден. Но тиде гына шагал. 2018 ий 27 декабрьыште «Об ответственном обращении с животными и о внесении изменений в отдельные законодательные акты РФ» федеральный законым лукмо. Тудын кугурак ужашыжым лач пийлан ойырымо. Тидын нерген Марий Элысе ветеринарий комитетын специалистше-влак умылтарат.
Оза мутым куча
Пӧрт воктене улшо площадкыште пий дене коштмаш 2019 ий марте закон кӱкшытыштӧ нигузе регулироватлалтын огыл. Но ынде федеральный закон почеш, пий оза-влак ӱмбаке кугу ответственность возын.
Пийым пачерыште ашныме годым ынде пийын праважым веле огыл, шуко пачеран пӧртлаште илыше еҥ-влакынат интересыштым шотыш налман. Пий дене уремыште шекланен коштман: вес еҥ але янлык эмганышаш огытыл.
Пийым тыгай верлаште шала колташ огеш лий:
йолешке-влакын корным вончымо верлаштышт,
шуко пачеран пӧрт подъездлаште,
лифтыште,
пӧрт воктенысе кумдыкышто,
йоча площадкылаште,
спортобъектлаште.
Ты йодмашым изи пийын озажат шуктышаш.
Тыгай верлаште кошташ лиеш:
пий дене кошташ келыштарыме авырен налме зонышто,
пешеходный корнылаште (тышке кӱвар ден переход-влакат пурат),
еҥ-влаклан канашышт ыштыме моло верыште.
Тыгак пий дене чара верлаште але чодыра касалыклаште кошташ лиеш. Тыгодым палемдыме зоно-влакым верысе кучем посна акт дене пеҥгыдемдышаш. Пий дене кушто кошташ лиймым ветеринар учрежденийлаште пален налаш лиеш.
Оза пийжым кучен огеш керт гын, тудо пий дене уремыш лекшаш огыл. Ты спискыш 14 ияш деч изирак йоча да аракам йӱшӧ еҥ-влак пурат.
Правилым пудыртымылан
Ответственность нерген нормо-влакым тӱҥ законыштат, регионласе посна законодательный актлаштат возымо.
Палемдыме огыл верыште, йоча площадкыште, школ кудывечыште, кочкыш-йӧрвар кевытлаште, аптекылаште да моло общественный верлаште коштмылан штрафым тӱлаш логалеш.
Пийым нерлык да поводок деч посна лукмылан але йӱшывуя пий дене коштмылан мутым кучаш перна.
Ынде общественный верлаште пий почеш терысым эрыкташ кӱлмымат федеральный кӱкшытыштӧ пеҥгыдемдыме.
Тӱрыс статьям 15 апрельыште лекше газетыште лудын кертыда. Кевыт