Морко район Кораксола клубын паша ярымже ик верыште ок шого. А тидланже клубна пелен чапланыше «Муро кумыл» фольклор ансамбль пеш кугу надырым пышта.
Тудын репертуарыштыже чыла тошто муро-влак йоҥгат.
«Муро кумылым» 2010 ийыштак Г.Иванова чумырен. Галина Михайловнан сомылжым таче В.Кириллова шуя.
Ансамбльыште тӱрлӧ ийготан мурызо уло. Эн кугу ийготан участницылан С.Соколова шотлалтеш. Светлана Георгиевна Морко район Панайке ял гыч. Мемнан Кораксола ял марте корно кужу, но тидыже Светлана Георгиевна ден Василий пелашыжлан нимыняр чаракым ок ыште.
Г.Иванова, В.Игнатьева, С.Эманова, Е.Кириллова, С.Филиппова, Н.Николаева да В.Кириллова ансамбльын чолга участницыже улыт. Ик семын вургемым келыштарен чиен колтат, йыр шогалын, сылнын муралтат.
Ты коллектив кушко гына миен коштын огыл, чыла вере порын вашлийыныт. Йошкар-Олаште Республик кӱкшытан Угинде пайремыште, Марий касыште пагалыме уна лиймына тачат поро шарнымаш семын кумылым вӱчка.
Шукерте огыл «Пошкудем» передачыште чолга артистна-влак Шорыкйол пайремым модын ончыктышт.
Икмыняр ий ончыч ансамбльышкына Р.Иванова коштеш ыле. Роза Николаевнан яндар йӱкшымат калык куанен колыштын. Таче ты мурызым шке ешыштына ужнена. Куштышо ансамбльнат ыле. Т.Семёнова, Б.Эманов, Н.Сергеева, А.Александров тыге лывыргын тавалтен колтеныт. Ме нунымат вучена.
Тале гармонист, Ярансола гыч Вениамин Борисов нигунамат ок сӧрвалтаре, керек-кунамат мыланна полыш кидым шуялта да сеҥымашыш шуаш полша.
Елена ГРИГОРЬЕВА
Морко район.