Марий Элыште нацпроект-влакым илышыш шыҥдарыме нерген кодшо кечылаште республикысе правительстве председательын икымше алмаштышыже М.З.Васютин дене мутланышна.
Тудо образований, тӱвыра да спорт аланлаште шукталтше паша-влаклан вуйын шога, сандене мутна тиде кӱкшыт нерген лиеш.
– Михаил Зиновьевич, могай нацпроект-влак ял илышым саемдаш полшат? Ты шотышто эртыше вич ийыште могай программе-влак лийыныт? Лишыл жапыште иктаж у программе илышыш шыҥдаралтеш мо?
– Чынжымак, нацпроект-влак деч ончыч ял илышым тӱрлӧ направлений дене тӱзаташ кугыжаныш программе-влак ыльыч. Тидлан посна отрасль вуйын шоген. Нацпроект почеш шуко ведомство пашам ышта. Тыгодым ме ужына: могай задаче мемнан ончылно шога, палемдыме идалыкыште могай лектышыш шушаш улына.
Мутлан, «Демографий» нацпроектлан кок министерстве мутым куча. Эн тӱҥ шонымашыже – еҥ-влакын ӱмырыштым 80 ий марте шуяш тыршаш. Медициныште геронтологийым (шоҥгылык ваштареш кучедалме наукым) да молымат вияҥдыман, эмлымверлам чоҥыман. Нацпроектыште образований сфере участвоватла да йочасад-влакым чоҥымо пашам авалта. Республикыштына сай ошкыл ышталтын: кызыт 3 ияш йоча-влаклан йочасадлаште черет уке.
УМБАКЫЖЕ «Кугарня» газетын 25 мартысе номерыштыже лудса.