Сергей НУХОВ, Пошкырт кундем, Балтач район:
– Мыйын авам Алима Султангалиевна Никулина Балтач районысо Кавырга ялеш шочын-кушкын, ешыштышт 11-ше йоча лийын.
Кызыт коктын веле кодыныт. Кандаш класс деч вара сӧсна фермыште пашам ышташ тӱҥалын. Ик ият пеле келшымеке, пошкудо Кӱан-Эҥер ялыш Альферт Нуховлан марлан лектын. Ынде 56 ий ваш келшен илат.
Куд йочам ончен куштеныт, 10 уныкашт, кок кугезе уныкашт улыт. Авана ятыр ий «Сигнал» колхозышто поварлан ыштен, вара школышто арулыкым эскерен. Паша стажше 31 ийыш погынен.
Авайна кажне ийын 1 январьыште йоча-шамычым шкеж дек чумыра да У ий дене саламла, пӧлекым ышта. Пырля илаш ӱжеш. Тудо кӱвареш шараш, пӱкеныш пышташ тӱрлӧ кружок-влакым пидеш. Кызыт шкаланже марла тувырым урген чийыш, оҥеш пижыкташ сӧрастарышым шкеак ыштыш.
Тудым чот йӧратена. Таза, кужу ӱмыран лий, авай.
Эльмир АНИСИМОВ, У Торъял район Токтарсола:
– Мыйын авам Вера Евгеньевна Веселова – пеш поро кумылан, сай айдеме. Ачам дене коктын кум икшывым ончен куштат. Авам кевытыште шуко ий пашам ышта.
Яра жапыште шӱжаремлан атлас ленте дене мотор резинке-влакым ыштылеш. Тыгак, тӱрлӧ арверым кучылтын, пакчам оҥай фигур-влак дене сылнештараш йӧрата. А пеледышыже могай гына уке! Пӧрткӧргыштат ятыр пеледыш шинчам куандара. Бисер денат пеледыш композицийым ямдылен.
Тыгак авам салфеткым, пушкыдо модышым пидеш, тӱрла. Тудын ыштен моштыдымо пашаже укеат докан. А кеҥежым тӱрлӧ емыжым поген, телылан шапашым ямдыла, поҥгым погаш йӧрата.
Шукерте огыл ме у пӧртыш илаш пурышна. Авам тидын дене чот кугешна. Вет мыняр ӱнар кӱлын, мыняр ойгыреныт.
Мый авам дене кугешнем да тудым пагалем, йӧратем.
—
«Авай дене пырля» лӱман конкурсым 21 январьыште увертаренна ыле. Тушко ятыр фото пурен да пура. Садлан конкурсым эше ик тылзылан шуена. Авада дене пырля ыштыме сай качестван фотом да тудын нерген возымым вучена.