Йошкар-Ола воктенысе Вараксинсола (Вараксино) ялеш шочшо да варажым лӱмлӧ сӱретчыш савырныше Георгий Осокинын (1922-1992) шочмыжлан тений 16 мартыште 100 ий темын.
Фронтовик-художник Г.М.Осокинлан Марий АССР сымыктышын сулло пашаеҥже лӱмым кугу надыржылан 1972 ийыште пуэныт. Тудо Марий кундемысе тоштер-влакын йодмышт почеш ятыр картиным сӱретлен. Сӱретчын тыршымыжлан кӧра кызыт Козьмодемьянскысе А.В.Григорьев лӱмеш ден Т.Евсеев лӱмеш Национальный тоштерлаште 1960-1980-ше ийласе совет сымыктышын коллекцийже уло. Лач нине радына-влак «Советская живопись, графика и скульптура» разделын негызше улыт. Марий кундемысе фондым пойдарымыжлан 1969 ийыште Г.Осокинлан Марий АССР Верховный советын почётан грамотшым кучыктымо.
Георгий 1940 ийыште Йошкар-Олаште кокияш изостудийыште тунемын. Сӱретлыме пашаштыже икымше туныктышо-влаклан Г.С.Зиновьев ден Б.И.Осиповым шотла. Нуно саде студийым вуйлатеныт да шкеак туныктеныт. А 1945 ийыште усталык шӱлышан рвезе Ленинградысе В.Мухина лӱмеш кӱшыл художественно-промышленный училищыш тунемаш пурен. Вич ий гыч тунем пытарымеке, тудым училищыште монументальный живописьын техникыже предметым туныкташ коденыт.
Сӱретче руш кугу поэт А.Пушкиным сӱретлаш йӧратен.
