Калыклан психолого-педагогический да социальный полышым пуымо «Доверие» рӱдер йоча-влак дене пырля ыштыме пашам – наставничествым – умбакыже виктара.
Кызыт марте изирак, но пеҥгыде командым чумырымо. «Шаг Вперёд» йоча да подростко-влаклан клубышто пашам ыштыше волонтёр-наставник-влак фотодизайным профессионально тунемыт, варажым шке моштымыштым рӱдерыште учётышто шогышо йоча ден подростко-влаклан туныктат. Фотограф профессийлан ямдылалташ да фотодизайным тунемаш латвич ӱдыр-рвезе кумылым ончыктен да «Фотоковоркинг» проектын участникше лийын. Тиде проект «Эн сай добровольчестве практике» конкурсышто Марий Эл Республик вуйлатышын грантшым сеҥен налын.
Коворкинг (пырля пашам ыштыме) йӧн образованийыште сай лектышыш шуаш кугу шӱкалтышым ышта, тыгак профессионально кушкаш йӧным пуа. Фото-коворкингым ыштымеке, рӱдер неле илыш ситуацийыш логалше ешысе йоча-влаклан вашла келшаш, творческий шӱлышым вияҥдаш да ончыкылык профессийым ойырен налаш полша.
Надежда МОИСЕЕВА.