Марий Элыште икымше стратегический сессийыште регионым 2036 ий марте вияҥдыме планым каҥашыме. Мероприятий Йошкар-Олаште Калык-влакын келшымаш пӧртыштышт эртаралтын. Тудым Марий Эл Правительстве Председательын икымше алмаштышыже Дмитрий Троицкий вӱден.
Сессийыште исполнительный да законодательный кучемын органлаштыже тыршыше пашаеҥ-влак, район вуйлатыше, тыгак деловой ден научный сообществыласе эксперт-шамыч лийыныт.
Участник-влак Марий Эл Республикым 2036 ий марте вияҥдыме социально-экономический стратегий проектын I ден II этапше-влакым ончен лектыныт. Нуно социально-экономический йодышла шотышто шке шонымашыштым чолган луктын каласеныт.
Дмитрий Троицкий палемден: шукталтшаш паша республикыште илыше кажне еҥын илышыжым саемдыме верч ышталтеш. Тыгай сессий икте-весым шонымаш дене палдарыше платформылан шотлалтеш да кундемнам вияҥдымаште пашам утыр тӱрлӧ могырым сайын да тичмашнек шукташ йӧным пуа.