Агата Симора,
мурызо, композитор, продюсер:
– 2023 ий мыланем волгыдо, тӱрлӧ мероприятийлан поян да ойыртемалтше лийын. Москошто илыше землякна-влаклан национально-культурный автономий дене пырля 11 утла кугу мероприятийым эртаренна. Тиде тӱҥ шотышто марий тӱвыра да илыш дене кылдалтше оҥай вашлиймаш-шамыч ыльыч. Пытартышыже, «Марий кас», 23 декабрьыште эртаралте.
Кодшо ийын Москошто кок усталык коллективым чумыренна. «Тумывий» ансамбльым Элина Кольцова вуйлата. Весыжым, «Моско Мари» марий этно-эстрадный хорым, мый вуйлатем. Коллектив-влак кум тӱнямбал да Российысе конкурсышто шке моштымашнам ончыктенна. «Тумывий» ансамбль «Сударушка» тӱнямбал фестивальыште икымше верым налын. Ынде тусо артист-влак вес ийын февральыште Санкт-Петербургыш эше ик конкурсыш каят. Тыгак ты кок коллектив, артист-влак Иван Каменщиков да Агата Симора Российысе тӱп калык-влакын «Этноскоп-2023» фестивальыштышт марий калыкын чапшым араленыт. Мастарлыкым ончыктымо деч посна марий семӱзгар-влак нерген лекций дене лийын.
Эше ик кугу событий уло илышемлан шарнымашеш кодеш. 4 декабрьыште «Мы вместе» премийым кучыктымо годым Родион Газманов дене палыме лийынам да «Россия» мурым пырля муренам. 16 тӱрлӧ йылме кокла гыч муро курыкмарлат йоҥгалтын.
23 декабрьыште ме Йӱштӧ Кугызан шочмо кечыж лӱмеш «Россия» тӱнямбал ончер-форумын мероприятийыштыже лийынна, «Моско Мари» хор ден «Тумывий» ансамбль уремысе сценыште марий тӱвырам ончыктенна.
Чылалан пиалым, сеҥымашым, йӧратымашым тыланем. Тендам пеш чот йӧратем да теният марий калык верч тыршаш тӱҥалам. У ий дене!