Наталья Кукушкина, Татарстанысе марий-влакын НКА-штым вуйлатыше:
– 2023 ийысе ик эн куан уверлан Татарстан Республикын Раисшын грантшым сеҥымым шотлем. Тудын дене ме «Марий шонанпыл» проектым илышыш шыҥдаренна. Тыгодым кундемнан кажне верже гыч йоча-влак марий тӱвырам да йылмым арален кодымо шот дене эртарыме конкурслаште участвоватлен кертыныт.
Шкемын сеҥымашем – «Озаҥысе идеальный ава-2023» конкурсышто икымше вице-миссис титул. Тыгак эше ик лӱмым пуэныт – «Озаҥысе миссис бизнес вумен-2023». Шукерте огыл кундемысе марий-влакын автономийыштын председательжылан сайленыт.
Кугу пашанан лектышыж семын эше ик премийым налмым каласыман. 118 мер организаций коклаште автономийналан 400 тӱжем теҥгеаш грантым пуэныт. Тыгайже вич организацийлан веле логалын.
Уло кумылын саламлем да У ийыште тазалыкым, вий-куатым, тӱрлӧ калык дене келшымашым тыланем. Куанен, пиал да перке дене илыза! Шочмо йылмына, тӱвырана тӱзланен шогыжо да ончыкылык тукым ты поянлыкна дене пайдаланыже.