Кодшо кечылаште РФ Правительстве Председательын алмаштышыже Т.Голикова «Культур» нацпроектым шуктымо шотышто совещанийым эртарен. Тушто республикнам вуйлатыше Ю.Зайцеват ушнен.
– 2023 ийыште федеральный бюджет гыч нацпроект почеш пашам шукташ 24,5 млрд теҥге ойыралтеш. Ныл тылзыште ты шотышто планым шуктымо. Тиде идалык национальный цельыш шумаште ик эн тӱҥлан шотлалтеш. Нелылык лектеш гынат, планым жапыштыже шукташ тыршыман, – каласен Татьяна Голикова.
Марий Элыште идалык мучаш марте Марий самырык театрым, Оршанке да Кужэҥер районлаште тӱвыра пӧрт-влакым, Медведево районысо Руэмысе сымыктыш школым, Юрино районышто Г.П.Лосев лӱмеш историко-художественный тоштерым уэмдышаш улыт. Тылеч посна Йошкар-Оласе Рӱдӧ йоча книгагудым модельныйыш савыраш, кундемысе тоштерлашке технический оборудованийым налаш палемдыме. Чылаже тидлан федеральный, республикысе да районласе бюджетла гыч 395, 5 млн теҥгем ойырат.
