2021 ийыште «КУГАРНЯ» кугыжаныш казна унитарный предприятийым ыштыме: тушко «Кугарня» ден «Ямде лий» газет редакций-влак пурталтыныт.
«Кугарня» газетын 30 ияш лӱмгече идалыкше тӱрлӧ сеҥымашлан поян лийын.
Республикысе тӱвыра, печать да калык-влакын пашашт шотышто министерствын эртарыме «Марий Эл – мыйын шепкам» сылнымут конкурсын «Марий йылме дене публицистике» номинацийыште Эльвира Терентьева сеҥен. Тыгак ты корреспондентлан ӱмаште Российысе Кыл, цифровой вияҥмаш да тӱшка коммуникаций министр М.И.Шадаев СМИ-ште ятыр ий пашам ыштымылан Чап грамотым кучыктен.
Марий Эл Правительствын кажне ийын увертарыме конкурсыштыжо «Лучшая работа по освещению проблем детей и молодежи в Республике Марий Эл» номинацийыште «Кугарня» газетын корреспонденташе Надежда Моисеева сеҥен.
Марий Эл Республикысе тӱвыра, печать да калык-влакын пашашт шотышто министерствын Почётан грамотшо дене Вероника Мустаевам, Алёна Яковлевам, Марина Богдановам, Ирина Шибанаевам палемдыме, Марий Эл Республикын Кугыжаныш Погынжын тауштымашыж дене – Ирина Александровам.
Фотокорреспондент Иван Речкинлан «За заслуги перед Марий Эл» орденын медальжым кучыктымо.
Ӱмаште «Ямде лий» газет 88 ийым темен.
Йоча прессын «Волшебное слово» VII всероссийский конкурсыштыжо «За преданность делу» номинацийыште «Ямде лий» газетын коллективше сеҥышыш лектын.
Тыгак тудо «Смиротворец-2021» всероссийский конкурсын Юл кундем федерал округысо йыжыҥжын шорт-листышкыже «Ший шондык» цикл дене логалын.
Науко да технологий идалыклан пӧлеклалтше республикысе конкурсышто корреспондент Христина Александрова «Науки юношей питают» номинацийыште сеҥышыш лектын.
«Кугарня» ГУКП-ште корреспондент-влак коклаште эртаралтше конкурсышто «Эн сай материал» номинацийыште «Кугарня» газет гыч Алёна Яковлева, «Ямде лий» газет гыч Елена Иванова сеҥеныт. «Пашаште эн ӱшанле» номинаций дене Эльвира Терентьевам палемдыме.