Йоча-влакын лагерьлаште кеҥеж канышышт дене кылдалтше совещанийыш Марий Элым Вуйлатыше Ю.Зайцев видеоконференций йӧн дене ушнен. Тудым РФ Правительстве Председательын алмаштышыже Татьяна Голикова эртарен.
Российысе вице-премьерын мутшо почеш, тений элыштына шукырак икшыве канышаш. Кеҥеж канышлан 2024 ийыште 5,3 млн теҥгем колташ палемдыме; 39,7 тӱжем организаций почылтшаш.
Марий Элыште 202 лагерь лийшаш. Тушто 31 тӱжем наре йоча канен кертеш. Тидыже кодшо ий деч 16 процентлан шукырак.
Республикыштына 178 школысо, ола воктенысе 20 стационарный да 4 палаточный лагерь-влак пашам ышташ тӱҥалыт. Нуно план почешак ямдылалтыт.
Тылеч посна Волжскысо рӱдӧ эмлымверын санаторийыштыже 160 икшыве шке тазалыкшым пеҥгыдемден кертеш. «Артек», «Орлёнок», «Смена», «Океан» Российысе лагерьлашке 200 наре йочам колташ палемдыме.
Неле илыш ситуацийыште улшо 12 тӱжем утла ӱдыр-рвезым кандараш да нунын тазалыкыштым пеҥгыдемдаш шонат. Кок стационарный ден школ пеленысе кок лагерьыште начар тазалыкан да инвалидностян 530 йочалан 4 инклюзивный смене лиеш.
Тылеч посна Марий Элысе лагерьлашке Белгород, Запорожье да Оренбург кундемла гыч 600 икшыве канаш толеш. 20 тӱжем утла йочалан кудывечысе площадкылаште, школ лесничествылаште посна программым ямдылыме. Тыгак поход, экспедиций да акций-влакат эртаралтыт.
Тӱрлӧ вере «Марийское лето с Движением Первых» фестиваль лиеш. Тудо кеҥеж мучко шуйна.
Шушаш кеҥеж каныш ден тазалыкым пеҥгыдемдыме пашалан чумыржо 78 млн утла теҥгем ойыраш палемдыме.
Эльвира Терентьева.