Йошкар-Оласе администрацийын данныйже почеш, Йошкар-Оласе вершӧрлам йӱклымӧ 19 объект кокла гыч кызыт эн ончылно Изи Какшан эҥер сер воктене каныме вер.
Кокымшо верыште – 9-ше микрорайонысо участке-влак. Тиде – Прохоров уремысе 36-шо №-ан пӧрт гыч Ян Крастынь уремысе 2-шо №-ан пӧрт марте, тыгак Прохоров уремысе 34-ше №-ан пӧрт воктеч Васильев ден Ян Крастынь урем-влак ушнымо марте йолешке-влаклан коштмо корным сӧралым ыштыме шотышто. Кумшо верыш Россий Армийын тӱвыра полатше воктенысе кумдык лектын.
Семёновкысо Молодёжный уремым сӧрастараш 2000 утла еҥ темла. А Куйбышев уремысе йолгорно (29-ше №-ан гыч 59-ше №-ан пӧрт марте), Павленко, Первомайский уремласе корно (Кремль урем гыч Йошкар Армий марте, чётный огыл могыржо), Сомбатхейыште пийым коштыктымо вер да Воскресенский парк ик тӱжем утларак йӱкым погеныт.
Чылаже 34 тӱжем утла еҥ йӱклен. Эн шуко йӱк дене ойырен налме объект-влакым 2022 ийыште федеральный окса кӱшеш олмыкташ да сӧрастараш тӱҥалыт.