19 октябрьыште Йошкар-Оласе Сеҥымашын ХХХ идалыкше лӱмеш тӱвыра полатыште «УГИНДЕ» фестиваль-конкурс лие. Тудым Марий тӱвыра рӱдер эртарен.
Марий калык кажне Тӱня кумалтыш годым, кӱсотыш лектын, Юмо деч серлагышым йодеш да вольык, кинде, мӱкш, кайыквусо, шийвундо перкелан таушта. Ожно колхозышто кажне паша кечылан икмыняр кило шурным шеледен пуэныт. Тунамат, кызытат кинде ик эн чесле кочышлан шотлалтеш. Тудо чынжымак пайдале, вет киндыште кӱртньӧ, вӱргене, марганец, селен, цинк микроэлемент-влак улыт.
Кумалмаш
Шыжым ужар посто гай ӱден кодымо мландым Ош Кугу Поро Юмына кужу йӱштӧ теле гоч, шке помышеш авыралын, шукш-копшаҥге, изи коля да кужу почан кугу сур коля дечат арален. А вара еҥ-влак шошо агалан тӱрлӧ ӱзгарым, техникым олмыктен ямдыленыт. Тыгодым Юмо-Пӱрышылан пелештен, сурт-пече гыч лектын каеныт да, аҥа вуйыш миен, Юмо-Пӱрышым сӧрвален кумалыныт. Вара пасуш лекше-влак шурным нур мучко пырчын-пырчын шавен коштыныт.
У кинде шочмылан марий-влак ешге кумалаш лектыныт. Нуно вольыклан тӱланымашым, мландылан ӱяҥдышым, ешыштлан тазалыкым да сай илышым йодын кумалыныт. Юмо нуным колжо манын, надырлан тичмаш киндым конденыт.
Фестиваль
Марий кундемыште «Угинде» пайремым фестиваль семын 2014 ий годсек эртарат. 19 октябрьыште Йошкар-Оласе Сеҥымашын ХХХ идалыкше лӱмеш тӱвыра полатыште фестиваль-конкурсыш фольклор да усталык коллектив-влак, кидмастар-влак погыненыт ыле. Фойеште Советский посёлко гыч толшо кидмастар Г.Булыгинан, «Энсай» салонын ыштыме сӧрастарыме арверыштым ужынна. А сценыште шке мастарлыкшым шым коллектив ончыктен. Нуно Угинде да Покро пайрем нерген посна сценарий дене шкешотан номерым ончыктеныт.
Угинде дене кылдалтше йӱлам шукташ марий-влак уло еш дене лектыныт. Икымше кинде шултышым перкеан але поян еҥлан пурлаш пуэныт. Икымше кылта дене киндым кӱэштыныт, сырам шолтеныт – У кинде пайремым ыштеныт…
УМБАКЫЖЕ — 22 октябрьысе «Кугарня» газетыште лудса.