18 элыш

«Экспорт продукции АПК» регионысо проект почеш тений январь-июльышто Марий Элысе агропромышленный комплекс сатун экспортшо 39,5 млн долларыш шуын. Ӱмашсе тыгаяк жап дене таҥастараш гын, тиде 195 процент лиеш.

Экспорт сатун 87 процентше – ямде кочкыш сату. Шыл да шӧр кок процентыш шуын, моло сату – 11 процент.

АПК сатум 18 элыш колтат, нунын коклаште – Таможенный Ушемыш пурышо эл-влак, Китай, Сербий, Германий, Польша, Грузий, Италий да молат. Марий Элын тӱҥ внешнеэкономический партнёржо-влаклан Узбекистаным, Белоруссийым, Таджикистаным да Китайым шотлыман, нине эллаш экспортын 80 процентше кая.