«Витаминка» салат
КӰЛЕШ: 5 кг ковышта, 1 кг болгар пурыс, 1 кг шоган, 1 кг кешыр, 4 кугу совла шинчал, 340 г сакырложаш, пел литр кушкыл ӱй, пел литр 9% уксус.
Ковыштам, пурысым, шоганым пӱчкедыман, кешырым тёрко гоч колтыман. Ӱйым, уксусым, шинчал ден сакырым пырля варыман да тушко опталман. Чыла тидым сайын пудыратыман да стерилизоватлыме банкылаш оптыман. Сайын темдыман, да, петырен, телылан йӱштӧ верыш поген шындыман.
••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• ••• •••
«Тамле муро» салат
КӰЛЕШ: 2 кг кабачок, 2 тамле пурыс, 1 кугу кешыр, 2 олма, 2 шоган, 4 пӱй чеснок, 1 кочо пурыс, 4 помидор, пел стакан кушкыл ӱй, пел стакан 9 % уксус.
Чыла пакчасаскам сайын мушман. Кабачок да олма деч посна молыжым эрыктыман да тыгыдын пӱчкедыман (блендер але мясорубко гочат колташ лиеш). Ынде кугу салмашке кушкыл ӱйым пыштыза, тушко чыла тиде вартышым опталза, шинчал ден сакырым пыштен пудыратыза, изи тулышто 15 минут тушитлыза. Тиде жапыште эрыктыме кабачокым (нӧшмыжымат кораҥдыман) олым семын, олмам изи ужашлан пӱчкедыза да, салмаш пыштен, эше 15 минут тулышто шинчыктыза. Сайын пудыратыза, уксусым ешарыза да, стерилизоватлыме банкылашке оптен, телылан поген шындыза.
Ирина СТЕПАНОВА.