Лач тынар блиндажлык сортам Медведево районысо Шойбулак селасе волонтёр-влак ыштен колтеныт.
«Всё для СВО» тӱшкашке кугурак ийготан 23 еҥ ушнен. Нуно, сомыл деч ярсымеке, Шойбулак тӱвыра рӱдерыш вашкеныт да сортам ямдыленыт.
Ты пашам чолга пенсионер-влак 2023 ий 10 ноябрь гыч тений 28 февраль марте шуктеныт. Лач тынарлан 4106 кг парафинышт ситен, тышеч 17547 сорта лектын. Тудым да фронтышто кучылташ кӱлешан моло арверым поген, Йошкар-Оласе дивизийыш колтеденыт, тыгак моло волонтёр-шамычланат пуэныт.
Тылеч посна пенсионер-шамыч носким пидыныт, йымал вургемым ургеныт, кофем, чайым, моло шере кочкышым чумыреныт да военнослужащий-шамычлан колтеденыт.
Тыгак Шойбулакысе быт комбинатын ондакысе пашаеҥже-влак Людмила Ивановна Рудометова ден Лидия Альбертовна Туева салтак-шамычлан йымал вургемым ургеныт. Тидлан куэмым рулон дене налме да селаште илыше поро кумылан еҥ-влакат мӧҥгышт гыч кондеденыт.
Волонтёр-влак деке Йошкар-Ола гыч 65 ияш Тамара Ивановна Любинат ушнен. Тудо тыгай поро паша шукталтме нерген ончычсо пошкудыжо, Шойбулак селаште илыше Галина Павловна Мурашова деч пален налын. Садлан тений 51 мужыр носким пидын ямдылен да салтак-влаклан колташ пуэн. Тудын нерген мыланна Галина Павловна каласкалыш:
– Тиде тыматле койышан ӱдырамаш ондакат носким пидеден. Ӱдыржӧ парикмахерскийыште пашам ышта. Сандене туддеке ӱпым тӱредыкташ отпускыш толшо салтак-влак пуреныт гын, аважын пидме носкижым кучыктен, куандарен колтен. Куэмымат конден, моло сомылышкат ушнен.
Кызыт тиде тӱшкаш ушнышо еҥ-влак сортам ышташ пӱгыльмым погат, калай ате-влакым ямдылат, варажым йӧн лийме семын парафиным налыт. А шӱм-чонышт дене сеҥымашым лишемдаш да сар вашкерак пытыже манын шонат.
Эльвира Терентьева.
Фото-влакым волонтёр группын архивше гыч налме.