16 шочшан ача-ава

Еш альбом гыч налме фото.

Тений мартыште Россий Президент В.Путинын Указше почеш Волжский район Пӧртанур ялыште илыше 16 шочшан ава Наталия Леонидовна Васильева «Героине-ава» почётан лӱм дене палемдалтын. Вате-марий Васильевмыт Наталия Леонидовна ден Владимир Александрович 11 шочшан ача-ава улыт. Ӱмаште Наталия Леонидовна эше шӱжаржын вич йочажым ончаш налын.

Морко гыч Самарыш

Вате-марий Васильевмыт тӱрлӧ вел гыч улыт. Наталия Леонидовна – Морко район Тыгыде Морко ялын шочшыжо гын, Владимир пелашыже – Самара кундем гыч. Чишкан ялыште рвезын коваже илен улмаш. Сандене тыштак нуно икте-весым вашлийыныт, йӧратен шынденыт, мужыраҥыныт.

Ик жап Самара олаште ешге иленыт, вара Татарстан Республикысе Зеленодольск олаш кусненыт. А 2011 ийыште шуко шочшан еш-влакын программышт почеш Юлсер кундем Пӧртанур ялыште пӧртым налыныт. Шӧр-торыкан лияш манын, вольыкым ашнаш тӱҥалыныт. Таче нуно кум ушкалым, чыве-шамычым кучат. Пакчаште пареҥгым, тӱрлӧ пакчасаскам куштат. Вольыклан ушменым шындат.

Наталия – профессийже дене бухгалтер, пытартыш жапыште кевытыште ужален. Тыгеже йоча-шамыч дене шогылтеш. Владимир пелашыже – леведышым тӧрлышӧ мастар еҥ. Кызыт тудо самозанятый семын пашам ышта: йодмо почеш еҥ-влакын пакчаштым куралеш, тырмала, шудым сола, оварта да молат. Тудын шке тракторжо уло, тидлан лӱмын агрегат-влакым наледен.

Вате-марийын эн шергаканже, эн кугу поянлыкше – тиде шочшышт-влак. Лиза ӱдырышт – тӱҥалтыш класслам туныктышо специальностьым налын. Кызыт Озаҥыште ила, но вес пашам ышта. Саша эргыштат Озаҥысе педагогический колледжыште программистлан тунемеш. А молышт школыш, йочасадыш коштыт. Кызыт Помар школышто Вова 10-шо классыште, Света 8-ше классыште, Юля 7-ше классыште, Аня 4-ше классыште, йыгыр ӱдыр-влак Виктория ден Анжелика 2-шо классыште тунемыт. Шым ияш Дима ден куд ияш Миша йочасадышке коштыт. Талукат лу тылзаш Илья дене аваже декретыште шинча.

Эше вич икшыве…

Илышыште лекше туткар вучыдымын эше вич йочам ешыш кондаш амалым луктын. Наталия Леонидовнан шӱжарже Морко район Зеленогорск посёлкышто илен, шкетынак йоча-влакым ончен куштен. Но нелын черланымыжлан кӧра вучыдымын ӱмыржӧ кӱрылтын. 2023 ийыште Наталия Леонидовна тудын вич икшывыжым ончаш налын.

Кызыт 15 ияш Максим 8-ше классыште, 12 ияш Кирилл 6-шо классыште, 10 ияш Ксения 5-ше классыште, 9 ияш Вероника 3-шо классыште тунемыт, куд ияш Даша йочасадыш коштеш. Йӧратыме кокашт таче кажныжлан авам алмашта, ойгым чытен лекташ полша, чон шокшым пӧлекла.

Йоча-шамыч мемнан ешлан шукертак тунемыныт. Каникул годымат мемнан деке чӱчкыдын толын коштыныт. Пелашем машинаш шинчеш да нуным конда ыле. Авашт колымеке, мыланем гына ончаш налаш ӱшан ыле. Ачашт икмыняр ий ончычак илыш дене чеверласен. Шӱжар-шольым-влакын ешышт кугу, ончаш налаш йӧнышт лийын огыл. Сандене меак ты пашалан пижна.

Таче нуно у илыме верлан, ешлан тунем шуыныт. Пӧртна кугу, илаш условийым ыштыме: кажныжын ӱстелже, кроватьше уло.

Чоныштым почаш ынышт ӧр манын, нунын дене шукырак мутланем. Тыгодым тунемышт, ушан-шотан лийышт манын тыршем. Кастене пырля шинчылтына, уроклан ямдылалтына, шинчымашым нӧлтена. Ксюша ден Вероника школышто куштымо кружокыш коштыт, Даша йочасадыште – шашке кружокышко.

Йоча-шамычым изинек пашалан кумылаҥдена. Кугурак эрге-влак вольыкым ончаш полшат, ӱдыр-шамыч пӧртыштӧ арулыкым эскерат: кӱварым ӱштыт, кӱмыж-совлам мушкыт.

Тынар йочам ончаш, мутат уке, куштылго огыл. Паша шуко логалеш. Ик жап нелынрак чучын, но таче тидлан тунемынам. Кажне кечын эрдене ныл шагат эртымеке кынелам, южгунамже 12 шагат йӱдым малаш возам.

«Героине-ава» лӱмым пуымо дене мыланна 1 миллион теҥгем ойыреныт. Тыгай уверым колмеке, пошкудо-влак шокшын саламлышт.

Ончыкылан йоча-шамычым туныктен лукташ кӱлеш. Келшыше профессийым налышт, илыш корнышт волгыдо лийже манын шонена, – каласыш Н.Васильева.

Васильевмыт ешге утларакшым мӧҥгыштӧ шогылтыт, футболла модыт, шочмо кечым пырля палемдат, южгунамже Приволжский посёлкыш йоча-шамычым бассейныш намиен кондат.

Икшыве-влаклан пӧлемым ышташ манын, кокымшо пачашым шотыш кондаш шонат.

16 йочам ончен кушташ – тиде моткоч ответственный, чытышым йодшо, ӱнарым налше паша. Шагал еҥ тыге ыштен кертеш, южышт кок-кум йочам ончаш неле маныт. Сандене Васильевмыт герой лӱмым сулышо улыт, кугешныде огеш лий. Еш поянлыкым аклен, икте-весым пагален, умылен илат. Йоча-влакда тендам куандарен гына шогышт!