ЮРИНО поселкышто паромым шогалме верым чоҥаш тӱҥалыт. Тиде нерген ВКонтактыште «Шереметьево замок» тӱшкаште увертарат. Паромым «Сумки-Юрино» кондыштарыме корным чоҥымо шотышто Марий Эл правительствыште эше кодшо ий сентябрьыште каҥашеныт. Республикысе правительствын информаций шотышто порталыштыже, Юл гоч шупшыктышо ик компаний судным налын. Тиде судным паром вончымашыште кучылт кертыт. Тыге Юрино села да Курыкмарий районын Сумки села коклаште кылым ышташ сай йӧн лектеш. Нине кок села кокла торалык – ныл километр. Тиде инвестрак вӱд пундашыжымат да серым эрыктымаште проектым илышыш пурташ кумылжым ончыктен.