Таче, 15 июньышто, Марий Элым вуйлатыше Александр Евстифеев СOVID-19 вирус ваштареш кучедалме шотышто 2020 ий 17 мартыште лукмо указышкыже вашталтыш-влакым пуртен. Тудын дене келшышын, республикыштына организаций ден амалкалче-влак 30% деч шагал огыл пашаеҥым, поснак 65 ияш деч кугурак да хронический черан-шамычым, дистанционный паша режимыш кусарышаш улыт. Тыгодым коронавирус инфекций ваштареш прививкым ыштыше-влак ончычсо семынак пашам ыштен кертыт.
Тылеч посна ынде ужалыме да каныме рӱдерлаште вуеш шудымо икшыве-влаклан ача-ава деч посна кошташ ок лий, йоча-шамычлан модаш келыштарыме пӧлем-влак петырналтыт. Ужалыме рӱдерлаште яра Wi-Fi Интернетымат чарат.
Коронавирус шарлыме деч шекланыме жапым 5 июль марте шуеныт. Ончычсо семынак тӱшка мероприятий-влакым эртараш ок лий, маскым чийыман да икте-весе коклаште дистанцийым кучыман.