Кызыт Российыште аналоговый телевещаний гыч цифровой телевиденийыш куснымо паша кая. У ий вашеш чыла регионышто цифровой телесеть пашам ышташ тӱҥалын. 20 телеканалым яра ончаш йӧн ышталтын. Марий Элыште илыше-влак тидын нерген мом шонат? Могай передаче ден каналым ончат?
Алексей Михайлов:
— Ме рӱдоласе пачерыштына кабельный да тыгодымак цифровой телевиденийым эше 2011 ийыштак чӱктенна. Утларакшым кинофильмым, сериалым, боевикым але комедийым ончена. Элыште мо ышталтме нерген пален налаш уверым колыштына. Мыняр канал улмым омат пале, шотлен омыл — моткоч шуко. А цифровой телевидений дачыштына уло. Тушто телевизор иктаж 2005 ий годсо, сандене приставкым налынна. Сайынак ончыкта. Ача-авам Моркышто илат, тушто «тарелке» веле келшен толеш ыле. Кызыт Марий Элыште цифровой сетьым пашаш колтымо, но тудым терген ончен огынал.
Марина Созонова:
— Ме Йошкар-Олаште цифровой телевиденийымак ончена. Еш дене пырля утларакшым 1 каналым, «Россия» каналым чӱктена. А шкетын улмо годым мый информационный каналым веле ончем. Йӧратыме канал шуко огыл. Телевизор ончылно тыглай шинчылташ ом йӧрате, жапым налеш да моло пашам кода, тудым шагалрак ончаш тыршем. Ялыште ача-авамат (нуно Марий Турек районышто илат) цифровой телевиденийым ончат.
Геннадий Антропов:
— Ме телевизорым кабельный телевидений полшымо дене ончена. Эргым гын йочалан келыштарыме каналым ончаш йӧрата. Мый гын шкеже чӱчкыдынак сай кинофильмым кычалам. Шочмо ялыштем ачам (тудо Кужэҥер районышто ила) цифровой телевидений дене пайдалана. Но чылаж годым сайын ок кучо, манеш.
Геннадий Григорьев:
— Телевизорым налмемлан иктаж 7-8 ий веле. Мый цифровой телевиденийым ончаш приставкым налынам. Но ала-молан сайынак огеш ончыкто. 10 каналым гына моторын ончаш йӧн уло. Мый спорт илышым эскерем, сандене спортым ончыктышо канал-влакым чӱктем.