13 ияш герой

Макар Мушковлан – 13 ий. Тудо ача-аваже, шольжо да шӱжарже дене пырля Чувашийысе Новочебоксарск олаште ила. Кажне кеҥеж канышлан Макар коваж дек Звенигово район Какшамарий ялыш толеш. Тушто тудын йолташыже-влак улыт, пырля канат, йӱштылаш коштыт.

Ик тыгай шокшо кечын рвезе йолташыже-влак дене пырля тораште огыл верланыше котлованыш йӱштылаш каен, да пуреҥгаяш тӱҥалше изи рвезым утарен. Кузе лийме нерген Макарын коваже Фаина Андреевна каласкала:

Тиде 15 июньышто лийын. Пакчаште шӱкшудым сомылем ыле. Макар мый декем тольо да йолташыже-влак дене пырля котлованыш йӱштылаш каем мане. Мый лӱдде колтышым, вет уныкам сайын иеш, тидлан тудым шке туныктенам. Йӱштылаш Кугу Какшан эҥерыш, котлованыш коштына. Жап эртымек, вӱд воктеке шкежат почешышт кайышым. Миен шумекем, рвезе-влак мӧҥгӧ толаш тарваненыт ыле. Тунам мыланем поро паша нерген нигӧ ыш ойло. Тиде вӱргечын лийын. Вара кугарнян Макарын аваже канышлан ялыш толын да мыланем ойла: «Макар рвезым утарен, палет мо?» «Уке, – манам, – нимом ом пале». Икмыняр жап гыч Макар деч рвезым утарымыж нерген йодым. «Утаренам», – мане да тетла нимат ыш каласкале. Вес кечын Миша йолташыж деч йодыштым. Тудо кузе лийме нерген ойлыш.

Ӧрткымышт дене саде изи рвезын лӱмжымат йодын огытыл, тудо иктаж 4-5 ияш улмаш. Ачаж дене пырля йӱштылаш миен. Ачаже серыште шинчен, а рвезе пуэн овартыме тыртыш дене вӱдышто йӱштылын. Ик татыште саде рвезе тыртыш гыч вӱдыш камвозын. Макармыт серыште шинченыт. Трукышто Макар вӱдыш тӧрштен да писын гына ийын каен. А рвезе-влак нимом умылен огытыл, тудо мемнан тыге йӱштылаш ӱжеш манын шоналтеныт. Вара ончат: икшыве тыртыш воктене кидше дене лупшкедылеш, вуйжо огешат кой. Макар саде рвезым, кидше гыч кучен, серыш луктын. Илыше кодмыжлан изи йоча Макарлан пачаш-пачаш тауштен.

Теве тыгай подвигым Макар Мушков ыштен. Тудо ончыч дзюдо дене, кызыт боевой самбо дене занятийыш коштеш. Рвезе нимо деч лӱдын ок шого. Кушкын шумекыже, ВДВ-ште служитлаш шона. Макарын ешыже, йолташыже-влак тудын дене моткоч кугешнат. Меат кугешнена!

Еш альбом гыч налме фото.