Пошкудо Чуваший Республик гыч Макар Мушков тений кеҥежым Марий Элысе Звенигово район Какшамарийыште коваж дене канен. 13 ияш рвезе шымше классыште тунемеш.
Ик шокшо кечын вӱд воктене канымыж годым тудо ныл ияш изи йочан йӱштылаш полшышо тыртыш гыч вӱдыш камвочмыжым ужын да вигак утараш тӧрштен. Макар шкенжым геройла ончыктен. Рвезын жапыштыже поро пашам шуктымыжым кӱкшын акленыт, тудым Федераций Совет «За проявленное мужество» медаль дене палемденыт. Калыкын икоян улмо кече вашеш Москошто йоча герой-влакым торжественно наградитленыт. Кугешнена тый денет, Макар!