Армийыш каяш шушо кажне рвезе эл ончылно порысым шуктышаш. Нунын салтак илышышт сборный пункт гыч тӱҥалеш.
Сборный пунктышто ужар форман, пеҥгыде капкылан, пӱсӧ шинчаончалтышан пӧръеҥ-влак самырык салтак-влакым илыш опытышт дене палдарат, кӱлешан темлымаш-влакым ойлат. Йошкар-Оласе Соловьев уремыште верланыше призывной пунктышто кок тыгай еҥ дене лишкырак палыме лийна.
Игорь Владимирович Унженин (пурлаште) Киров кундем Пижанке районысо Марий Ошай ялыште шочын. 11 классым тунем пытарымеке, армийыш каен. Ленинград областьысе Гатчина ола воктене, ик тылзе Магаданыште учебкылаште лийын. Вара Камчаткыште Корякский АО-што связь войскаште шофёр лийын. Армий деч вара шочмо кундемыш пӧртылын, школышто пашам ыштен. Тыгодымак Н.Крупская лӱмеш Марий пединститутышто спортфакыште заочно шинчымашым поген. Тунем пытаренат, кум ийым Волжск олаште МВД пӧлка пелен изоляторышто конвойный службышто ыштен. Икмыняр ий гыч Йошкар-Олаш кусареныт. Ик жап тыште пашам ыштымеке, контракт почеш Самара областьысе Кряж селаште мотострелковый войскаште служитлен. Кызыт Йошкар-Олаште призывной пунктыш физподготовко дене инструкторлан ышта.
Кажне гаяк призывник Игорь Владимировичым палышаш, молан манаш гын медкомиссий деч вара физподготовке дене нормативым тудо терга. Кеҥежым «Дружба» стадионышто, телым «Марий Эл» ареныште нормативым сдатлат.
Яра жапше годым Игорь Владимирович пырля пашам ыштыме йолташыже-влак дене футболла, баскетболла модеш. Тидлан арняште кок-кум кечым ойыра.
«Армийыште офицер лияш шонымашем лийын, но куштотунемаш лийме нерген пален омыл», — каласыш И.Унженин.
Абдулхаким Рахматуллаевич Назаров (шолаште) Йошкар-Олаште шочын-кушкын, 14-ше №-ан гимназийым тунем пытарен. Школ деч вара вигак армийыш каен, Владимир областьыште учебкым эртен. 2012-2014 ийлаште Чечняште мотострелковый бригадыште лийын, а вара Угарман кундемысе Дзержинск олаште, Мулино посёлкышто верланше танковый войскаште служитлен. 8-ше танковый ротын наводчик-операторжо лийын. 2014 ий шыжым Донбассыште боевой действий годым батальонын составыштыже лийын, «За боевые отличия» медаль дене палемдалтын. А.Назаров 11 ий контракт почеш служитла. Кызыт Угарман кундемысе танковый войскаште службым эрта, старший сержант званийым налын.
Ты гана шочмо олашкыже командировкыш, Марий Элысе призывник-влакым налаш толын