5 мартыште Марий Элысе Образований да науко министерствын коллегийжын заседанийже эртаралтын.
Тушто 2023 ийысе пашам иктешлыме, у идалыклан задаче-влакым палемдыме. Мероприятийыште Марий Элым Вуйлатыше Ю.Зайцев лийын.
Тудын мутшо почеш, образований аланлан 2023 ийыште 12,1 млрд теҥгем колтымо. 2022 ий дене таҥастарымаште 21 процентлан шукырак оксам ойырымо. Нацпроект-влак ты сферым утыр вияҥдаш, у тунемме тӧнеж-влакым почаш да тоштыжым уэмдаш полшат.
Республикысе образований да науко министр Л.Ревуцкаян мутшо почеш, 2-3 да 3-7 ияш чыла йочалан, 34 тӱжем ньогалан, йочасадыште верым пуымо. Кызыт нунылан школлаште у верым ыштат, 2719 веран ныл школым чоҥат, тышеч кокытшым – Йошкар-Олаште.
Школым капитально олмыктымо программе почеш 19 тӧнежым ачалыме. Лишыл кум ийыште эше 30 школ уэмшаш. «Современная школа» федеральный проект почеш районлаште тунемше 11 тӱжем йоча 79 «Точка роста» рӱдерыште естественный наукым тунемын да проект ден шымлыме пашам шуктен кертеш. 2024 ийыште 1500 тунемшылан эше 26 рӱдер лийшаш.
4500 икшыве кум «Кванториум» йоча технопаркыште инженерный наукым да изобретенийым тунемеш. Тений эше кум технопарк почылтшаш.
«Цифровая образовательная среда» федеральный проект почеш кум «IT-куб» цифровой образований рӱдер «шочын». 2024 ийыште ешартыш шинчымашым налаш 6336 верым ямдылат.
Выпускник-влакын единый кугыжаныш экзамен дене лектышыштат саемын. 100 баллым кок пачаш шукырак тунемше поген.
Тыгак Педагогын да наставникын идалыкыштышт образований сферысе пашаеҥ-влаклан кугу тӱткышым ойырымо.